Me afrimin e samitit BE-Kinë, Komisioni Evropian bëri kritika të ashpra ndaj Kinës, duke e akuzuar atë për “shtrembërim” të tregtisë, “përmbytje” të tregjeve globale dhe “krijim të paqëndrueshmërisë dhe pasigurisë së shtuar” në krizën e Ukrainës.
Këto komente janë të njëanshme dhe nuk marrin parasysh ndërlikimin e tregtisë globale, zinxhirëve të furnizimit dhe diplomacisë ndërkombëtare, vuri në dukje Grupi Mediatik i Kinës (CMG) në një koment të tij.
Në radhë të parë, gjendja aktuale e tregtisë Kinë-BE pasqyron ndikimin e kombinuar të mjedisit makroekonomik, kushteve të tregtisë ndërkombëtare dhe strukturës industriale të dy palëve. Me të vërtetë Kina ka një suficit tregtar me BE-në, por shkaktar për këtë nuk mund të quhet vetëm njëra palë, vijon komenti i CMG-së.
Kina e ka shprehur në disa raste gatishmërinë e saj për të zgjeruar importet nga Evropa të produkteve me cilësi të lartë dhe të orientuara nga tregu. Por BE-ja, përkundrazi, këmbëngul në vendosjen e pengesave kundër firmave kineze në tenderat e prokurimeve të mëdha publike, duke përfshirë pajisjet mjekësore. Pavarësisht nga sinqeriteti i Pekinit në bisedimet dypalëshe, BE-ja është këmbëngulëse në ngritjen e pengesave të reja që dëmtojnë rëndë konkurrencën e barabartë.
Komisioni Evropian theksoi gjithashtu përparësinë “për të përshpejtuar çrrezikimin”. Nuk mund të mohohet fakti që disa produkte kineze mbizotërojnë në tregjet globale, por kjo varet nga ligjet e ekonomisë së tregut.
Aftësia konkurruese e produkteve kineze është rezultat i investimeve dhe i novacionit afatgjatë, jo “i subvencioneve të tepërta shtetërore”, siç trumbetojnë disa politikanë perëndimorë, vihet në dukje në komentin e CMG-së. Në vitin 2024, shpenzimet e Kinës për kërkim dhe zhvillim arritën në 3.6 trilionë juanë (502 miliardë dollarë amerikanë), sipas të dhënave zyrtare. Kina u ngjit në vendin e 11-të në renditjen e Treguesit Global të Novacionit, duke e bërë atë një nga vendet me rritjen më të shpejtë në dekadën e fundit.
Novacion teknologjik do të thotë që kompanitë kineze janë të afta të prodhojnë produkte me cilësi më të lartë dhe me kosto ë të ulët. Kjo shpjegon epërsinë e çmimeve të produkteve “Prodhuar në Kinë”.
Në komentin e CMG-së merret si shembull teknologjia e baterive e Kinës. Prodhuesi gjigant kinez CATL njoftoi kohët e fundit përparime teknologjike që mundësojnë prodhimin masiv të baterive më të lira, më të lehta, më të shpejta për t’u rimbushur dhe më rezistente ndaj të ftohtit. Kjo e bën CATL-in më konkurrues në çmim, dhe kështu më të popullarizuar në tregjet globale.
Produkte baterie të kompanisë CATL / Xinhua
Përveç kësaj, epërsitë e Kinës në infrastrukturë nënkuptojnë se shumica e përbërësve të produkteve kineze mund të prodhohen dhe montohen brenda vendit, duke e ulur kështu shumë koston e tyre të prodhimit. Duke e akuzuar Kinën për “kapacitet të subvencionuar”, politikanët perëndimorë po shmangin përgjegjësitë për dështimin e tyre në rigjallërimin e prodhimit vendas dhe po përpiqen për të dëbuar rivalët nga tregjet e tyre që duhet të ishin të hapura dhe të lira.
Ndërkohë, pretendimi i Komisionit Evropian që Kina po “mbështet faktikisht” ekonominë e luftës të Rusisë shtrembëron qëndrimin diplomatik të Kinës ndaj krizës së Ukrainës, komentoi CMG-ja. Qeveria kineze ka nxitur vazhdimisht paqen e dialogun dhe ka qenë për zgjidhjen politike, duke iu përmbajtur parimeve të sovranitetit dhe mosndërhyrjes. Marrëdhëniet ekonomike të Kinës me Rusinë janë të ligjshme e në përputhje me normat e tregtisë globale, dhe shumë vende, përfshirë disa anëtarë të BE-së, mbajnë marrëdhënie të ngjashme.
“Pozicioni i Kinës për krizën e Ukrainës ka qenë i hapur e i qëndrueshëm, duke këmbëngulur në bisedimet e paqes, duke mos ofruar armë vdekjeprurëse për palët në konflikt dhe duke kontrolluar në mënyrë rigoroze eksportin e artikujve me përdorim të dyfishtë (civil/ushtarak), duke përfshirë dronët”, sqaroi më parë ministri i Jashtëm kinez Wang Yi, gjithashtu anëtar i Byrosë Politike të Komitetit Qendror të Partisë Komuniste të Kinës.
Që nga shpërthimi i krizës, Kina ka marrë pjesë në mënyrë aktive në ndërmjetësimin diplomatik, duke mbajtur komunikimin me të gjitha palët përkatëse, përfshirë Rusinë e Ukrainën, dhe duke u përfshirë thellësisht në diskutimet për këtë çështje brenda kornizës së Këshillit të Sigurimit të OKB-së. Akuza ndaj Kinës për bashkëfajësi në rajon i shpërfill këto përpjekje dhe rrezikon të minojë bashkëpunimin ndërkombëtar të nevojshëm për të zgjidhur këtë krizë.
Kritikat perëndimore ndaj Kinës pasqyrojnë një këndvështrim të ngushtë që anashkalon kontributet pozitive të Kinës në tregtinë globale dhe përpjekjet e saj për paqe.
Në vend që “të ribalancojë” marrëdhëniet ekonomike me Kinën siç pretendojnë disa politikanë perëndimorë, BE-ja duhet të rregullojë mendësinë e vet. Sfidat me të cilat përballet bota sot kërkojnë bashkëpunim, jo kundërvënie. Një politikë pozitive dhe pragmatike ndaj Kinës është ajo që nevojitet tani, përfundon komenti i CMG-së./cgtn
