Shtetet e Bashkuara i kanë refuzuar Presidentit palestinez Mahmud Abas hyrjen në SHBApër të marrë pjesë në Asamblenë e Përgjithshme të OKB-së që do të zhvillohet në shtator. Përveç kësaj Departamenti i Shtetit njoftoi se do t’u revokohen vizat edhe rreth 80 përfaqësuesve të tjerë palestinezë.
“Është në interesin e sigurisë sonë kombëtare t’i konsiderojmë PLO-në [Organizatën për Çlirimin e Palestinës] dhe Autoritetin Palestinez (AP) përgjegjës për dështimin në përmbushjen e angazhimeve të tyre dhe minimin e perspektivave për paqe”, shkroi Departamenti i Shtetit. Për t’u konsideruar si partnerë në procesin e paqes, PLO dhe AP duhet së pari “të refuzojnë vazhdimisht terrorizmin”.
Sanches: Refuzimi i vizës është i padrejtë
Kryeministri i Spanjës, Pedro Sanches, telefonoi me Presidentin e Autoritetit Palestinez Mahmud Abas, pasi SHBA i mohoi atij vizën, dhe i shprehu atij mbështetjen e Madridit. Refuzimi i vizës është “i padrejtë”, shkroi Sanchez në një postim në platformën X.
Ministri i Jashtëm i Francës, Jean-Noël Barrot, tha në kuadër të një takimi të ministrave të Jashtëm të BE-së në kryeqytetin danez Kopenhagen: “Një debat i përgjithshëm në Kombet e Bashkuara nuk duhet t’i nënshtrohet asnjë kufizimi për të marrë pjesë.” Barrot nuk i përmendi drejtpërdrejtë SHBA-në ose palestinezët, por tha në mënyrë të përgjithshme se selia e OKB-së në Nju-Jork është “një vend neutraliteti” dhe “strehë në shërbim të paqes”.
Sfondi i reagimit të SHBA-së
Anulimi i vizave për përfaqësuesit palestinezë është shprehje e qëndrimit refuzues të SHBA-së ndaj njohjes zyrtare të shtetit palestinez nga disa vende aleate kryesore të SHBA-së. Britania e Madhe, Franca, Australia dhe Kanadaja, planifikojnë ta njohin zyrtarisht shtetin palestinez në kuadrin e Asamblesë së Përgjithshme të OKB-së që zhvillohet në shtator.
Premtimet e tyre shihen si shprehje zhgënjimi për veprimet e Izraelit në Rripin e Gazës, ku Hamasi militant islamist, ende qeveris zyrtarisht, si dhe për zgjerimin e vendbanimeve izraelite në Bregun Perëndimor.
Deri tani të paktën 147 nga 193 shtetet anëtare të OKB-së e njohin tashmë shtetin palestinez. Megjithatë palestinezët ende nuk janë anëtarë të plotë në Kombet e Bashkuara. Izraeli e sheh njohjen e planifikuar nga shtetet e tjera si një “shpërblim për Hamasin”, të klasifikuar si organizatë terroriste nga shumë shtete./DW
