Ministri i Brendshëm i Gjermanisë, Alexander Dobrindt, ka bërë thirrje për forcimin e sistemeve të mbrojtjes civile në vend si përgjigje ndaj ndryshimeve në peizazhin e kërcënimeve — dhe ka inkurajuar qytetarët që të përgatiten vetë për skenarë të mundshëm katastrofash.
Ai deklaroi se vendi nuk mund të fokusohet vetëm te “siguria ushtarake”, por edhe te “mbrojtja civile dhe mbrojtja e popullsisë.” Këtë e tha të shtunën në qytetin verior të Rostock-ut, ku qeveria po shënonte Ditën e Mbrojtjes Civile.
Qeveria federale po punon së bashku me 16 landet (shtetet federale) për të vlerësuar disponueshmërinë e strehimoreve në të gjithë vendin. Dobrindt theksoi se shumë strehimore ishin çmontuar gjatë dekadave të kaluara – një vendim që tashmë po rishikohet nga Berlini.
A janë gjermanët të përgatitur?
Ministri theksoi gjithashtu se qytetarët duhet të marrin përgjegjësi për përgatitjen e tyre për emergjenca, si p.sh. të kenë rezerva ushqimi dhe uji.
Ai përmendi se në shtëpi ka një radio me dorezë për karikim. “Kam edhe një elektrik dore me mekanizëm dore — dhe madje edhe një power bank që mund të karikohet me dorë,” tha ai.
Ralph Tiesler, presidenti i Zyrës për Mbrojtje Civile dhe Ndihmë në Katastrofa (BBK), theksoi gjithashtu nevojën për të parë mbrojtjen civile dhe atë ushtarake si të ndërlidhura.
“Duke mbrojtur strukturat dhe burimet civile, sigurojmë që edhe mbrojtja ushtarake të funksionojë,” u shpreh ai. Një shoqëri rezistente, shtoi ai, është çelësi i përgatitjes kombëtare.
Rreth 40 organizata të shërbimeve emergjente — nga zjarrfikësit deri te agjencitë e ndihmës në katastrofa — morën pjesë në ngjarjen publike në portin e Rostock-ut./dpa-argumentum.al
