Në vijim të publikimit të artikullit me titull “Një cirk tragjik: Në median shqiptare, një ‘analiste e fabrikuar’ bëhet virale”, me autor Vladimir Karaj, në platformën Reporter.al (BIRN Albania), ndjejmë detyrimin profesional të bëjmë disa sqarime të mëtejshme në emër të transparencës dhe korrektësisë.
Sqarojmë se ne kemi bashkëpunuar në mënyrë të drejtpërdrejtë me gazetarin Vladimir Karaj, duke iu përgjigjur interesimit të tij për mënyrën se si portali Argumentum.al vendosi të publikojë artikullin në fjalë. Kemi qenë të hapur dhe transparentë në gjithë procesin e komunikimit. Megjithatë, pavarësisht këtij bashkëpunimi korrekt, artikulli “investigativ” përmban pasaktësi serioze dhe nxit një perceptim të gabuar mbi rolin dhe qëndrimin editorial të medias sonë.
Në lidhje me debatet dhe komentet publike që kanë shoqëruar publikimin e artikullit me autorësinë e “Helen Bratt” në portalin tonë më 18 maj 2025, redaksia e “Argumentum” dëshiron të sqarojë disa çështje thelbësore, duke theksuar parimet që na udhëheqin në punën tonë:
Redaksia e “Argumentum” ka publikuar një artikull të dërguar në adresen e elektronike te Argumentum.al, të cilin e kemi shqyrtuar dhe vlerësuar si profesionalisht të strukturuar, të bazuar në fakte të hapura dhe në përputhje me vijën tonë editoriale. Për ne ka rëndësi përmbajtja dhe interesi publik që shërben, jo emri i autorit apo spekulimet që vijnë më pas.
Në asnjë moment, redaksia e “Argumentum” nuk e ka paraqitur autoren si eksperte të verifikuar apo si përfaqësuese të ndonjë institucioni. Ne nuk kemi sajuar emra, nuk kemi fabrikuar burime dhe nuk kemi paraqitur të pavërteta. Ky nuk është një rast dizinformimi, por një zgjedhje editoriale për të pasqyruar një analizë që na është dukur e argumentuar dhe me interes publik.
Ne nuk mund dhe nuk duam të kontrollojmë mënyrën sesi mediat e tjera — qofshin ato Top Channel, Tema apo çdo media tjetër që e kanë ripublikuar këtë artikull. Ripublikimi nuk është përgjegjësi e jona, as nuk është provë e ndonjë skeme të fabrikuar. Ne nuk kemi bashkëpunuar me asnjë palë për amplifikimin e këtij artikulli dhe nuk mbajmë përgjegjësi për skemën e copy-paste të të tjerëve.
Për ne mjafton që artikulli është i shkruar mirë, nuk shkel asnjë standard etik dhe është trajtuar me përgjegjësi editoriale nga redaksia jonë. Madje, vetë Z. Vladimri Karaj në komunikimin tonë verbal e pranoi që përmbajtja e shkrimit ‘A Tragic Circus’: Albanian PD Figures Lash Out After LaCivita-Backed Campaign Collapses duket nga një dorë profesionale. A nuk mjafton kjo për një media serioze që punon me etikë?
Mendoj se një artikull nuk mund të anatemohet si “i sajuar” vetëm pse nuk dihet me siguri nëse autorja ka intervistuar realisht zyrtarë të Partisë Demokratike. Gazetari Vladimir Karaj, apo çdo koleg tjetër, nuk ka asnjë mundësi të verifikojë nëse janë marrë apo jo prononcime nga burime brenda PD-së, për sa kohë ato janë dhënë në kushte të plota të anonimitetit.
Si gazetarë e dimë mirë që qindra artikuj botohen çdo muaj me citime nga “burime brenda partisë”, “zyrtarë që nuk pranojnë të identifikohen” apo “figura të afërta me çështjen”. Të gjithë e dimë që kjo është praktikë e pranuar dhe jo e ndaluar në gazetari, për sa kohë gazetarët marrin përgjegjësinë për verifikimin dhe balancimin e informacionit.
Prandaj nuk mund të hedhim poshtë një artikull vetëm sepse burimet janë anonime, për aq kohë sa nuk ka shpifje, dhe struktura e tekstit është brenda standardeve të gazetarisë analitike apo komentuese.
Në redaksinë e Argumentum, drejtohen rregullisht shumë autorë, si të huaj ashtu edhe shqiptarë, të rinj dhe me përvojë që na dërgojnë materiale për publikim, kryesisht opinione dhe analiza, dhe ne mirëpresim çdo opinion, analizë dhe këndvështrim që respekton parimet bazë të etikës gazetareske dhe që përputhen me fokusin editorial të kësaj media online. Jemi gjithmonë në shërbim të lexuesit dhe interesit publik, dhe besojmë se media të vogla si e jona duhet të mbështeten, jo të anatemohet apo sulmohen, veçanërisht kur ato përpiqen të mbajnë zërin e pavarur në një hapësirë mediatike shpesh të monopolizuar.
Gjithashtu theksojmë se jemi të hapur të botojmë sqarime, kundër-argumente apo pozicionime zyrtare nga Partia Demokratike apo çdo aktor tjetër i përmendur në artikull.
Por nga ana tjetër padiskutim dënojmë standardet e dyfishta.
Të njëjtat media që më parë kanë shpërndarë materiale të dyshimta, pa emër autori ose nga burime të paidentifikuara,( sikundër e përmend vetë Z. Karaj në artikullin e tij) sot sulmojnë për publikimin e një artikulli që prek një temë të papërshtatshme për ta. Kjo është hipokrizi mediatike, jo standard profesional.
Ja çfarë thotë z. Karaj:
“Faqja web, Politiko.al, e botuar nga shefi i komunikimit në PD, Alfred Lela, publikoi një shkrim ku pretendonte se artikulli me autorësinë e Bratt ishte prodhuar me Inteligjencë Artificiale dhe se autorja nuk ekzistonte. Politiko.al akuzoi gjithashtu gazetën Tema të gazetarit Mero Baze se e kishte shpikur shkrimin “për reagimin e figurave të PD” kundër Berishës dhe LaCivita.
“Dyshova sepse nuk kishte burimin. Nuk kishte një referencë,” i tha Lela BIRN, ndërsa shtoi se teksti nuk kishte gjithashtu asnjë të dhënë për Helen Bratt.
Gjashtë vite më parë, media e drejtuar nga Lela ishte njëra prej atyre që ripublikoi shkrimin e marrë nga Protothema, por Lela u justifikua se në atë kohë “burimi ka qenë i qartë”.
“Ne nuk vëmë në dyshim median greke, në këtë rast Protothema,” tha ai.
E njëjta autore, kur shkruan në Protothema, nuk vihet në dyshim, por kur artikujt e saj publikohen në Argumentum.al ose në Gazeta Tema, ajo konsiderohet si burim dizinformimi?
Njëkohësisht është hipokrizi që të njëjtat media që më parë kanë ripublikuar pa asnjë shqyrtim artikuj të Helen Bratt (në 2019, https://telegrafi.com/en/edi-rama-po-e-con-vendin-drejt-konfliktit/ kur targetohej PS dhe Edi Rama), sot të hedhin poshtë të njëjtin autor vetëm sepse shkrimi godet Sali Berishën.
Vertetë figura e “Helen Bratt” duket e dyshimtë, nuk ka prani në rrjetet sociale, nuk ka biografi, nuk ka shumë shkrime. Por ajo ka botuar më parë dy artikuj në një gazetë greke, të cilët u përkthyen, u shpërndanë dhe u përdorën në favor të opozitës së atëhershme shqiptare, përfshirë në raportime zyrtare.
Pra kur Helen Bratt (apo kushdo qoftë ai/ajo) godet qeverinë, ajo pranohet si legjitime; kur kritikon opozitën, shpallet mashtrim ose operacion dizinformimi???
Z. Karaj pohon se artikulli me emrin “Helen Bratt” është shpërndarë në mënyrë të organizuar në disa media, ndërsa në versionin anglisht pretendohet se është dërguar posaçërisht tek Argumentum.al, duke bërë që gazeta TEMA e kanë marrë nga Argumentum.al. Kjo nuk mund të përdoret si bazë për të etiketuar medien tonë si “burim manipulimi” apo si pjesë e një fabrike dizinformimi.
Z. Karaj, në mënyrë të padrejtë, përpiqet të vendosë Argumentum.al si “kokë turku”, vetëm sepse kemi zgjedhur të publikojmë një artikull që sipas vlerësimit tonë editorial trajton një çështje me interes publik. E theksojmë se interesi ynë i vetëm është t’i ofrojmë publikut një gamë të gjerë këndvështrimesh, të pavarura nga ngjyra politike apo prapavija institucionale.
Kjo nuk është gazetari investigative, por një përpjekje për të bërë zhurmë mediatike duke diskredituar një media tjetër, një praktikë që nuk i shërben as të vërtetës dhe as publikut.
Përgjigje ndaj komenteve të z. Erlis Çela
Me keqardhje lexuam gjithashtu komentin e z. Erlis Çela, i cili e përfshin rastin në fjalë si shembull të asaj që ai e quan “Fake Persona Journalism”. “Skema kërkon përdorimin e një faqeje pothuajse anonime dhe më pas artikulli i rremë amplikfikohet nga media lokale, të cilat nuk e verifikojnë qëllimisht identitetin e autorit,” thekson ai. .
I bëjmë me dije z. Çela dhe kujtdo të interesuar se Portali Argumentum.al nuk është një media anonime, as një faqe e sapohapur e paidentifikuar. Përkundrazi, ne kemi vite që kontribuojmë me përmbajtje të verifikuar, analiza të thelluara, intervista dhe raportime të bazuara në etikë gazetareske. Të gjithë materialet tona janë të arkivuara dhe publike, të firmosura nga autorë të identifikuar dhe me qëndrim editorial të qartë.
Fatkeqësisht, duket se z. Çela nuk e ka bërë këtë dhe ka zgjedhur të flasë mbi Argumentum duke u mbështetur vetëm në një rast të vetëm, pa shqyrtuar kontekstin apo punën tonë të mëparshme. Kjo është për të ardhur keq dhe tregon pikërisht atë që po denoncojmë: nxitimin për të bërë një “scoop” mediatik, në vend të një analize profesionale apo investigimi serioz gazetaresk.
Ne refuzojmë çdo përpjekje për të bërë Argumentum.al “kurban” në një debat mediatiko-politik. Refuzojmë etiketime të pabazuara, që cënojnë integritetin e redaksisë dhe lirinë tonë për të zgjedhur çfarë botojmë, për aq kohë sa kjo respekton etikën profesionale.
“Në gjithë këtë histori, në këtë cirk mediatik që për fat të keq mbahet peng nga një aleancë politiko-mediatike prej më shumë se tre dekadash, me keqardhje konstatoj se gazetaria në Shqipëri është në grahmat e saj të fundit, madje edhe kur serviret nën emrin e gazetarisë investiguese.
Por, si një njeri që këtë profesion e ka mision, rrugëtimi mediatik i Argumentum.al vijon si një Media e Pavarur e Paanashme dhe Profesionale!
Marjana DODA
Kryeredaktore
© 2025 Argumentum
