Shqetësimi kryesor i Dhomës së Tregtisë është se asnjëra nga paketat e qeverisë nuk ka qenë efektive për biznesin. “Masa e financimit është shumë e ulët, ndërsa pengesat burokratike i kanë bërë ato të pazbatueshme. Si rrjedhojë, sot në kohë emergjence financimi i ekonomisë është inekzistent, ndërsa sektorë si biznesi prodhues, turizmi, bujqësia dhe transporti mbeten ende pa asnjë mbështetje.”- u tha gjatë takimit.
Një nga pikat kryesore të diskutimit mes kreut të opozitës dhe Dhomës së Tregtisë Tiranë ishte edhe mënyra e menaxhimit të pandemisë dhe krizës ekonomike, që sipas Bashës, ishin dështimi i Ramës.
“Fatkeqësisht, këto dështime po i kushtojnë shumë shtrenjtë shqiptarëve dhe ekonomisë së tyre që sot po varfërohen edhe më shumë. Partia Demokratike propozoi masa konkrete mbështetëse për biznesin vendas dhe për të punësuarit e tij, por Rama zgjodhi t’i harxhojë lekët e buxhetit të shtetit për një grusht oligarkësh dhe jo për njerëzit. Ai është sot e keqja më e madhe për vendin.”- tha zoti Basha, i cili theksoi se plani i opozitës për rimëkëmbjen ekonomike të vendit dhe rritjen e punësimit të shqiptarëve është prioritet absolut i programit të ardhshëm qeveritar.
“Përveç ndihmës financiare për të kapërcyer krizën, ne do të ofrojmë edhe instrumentat dhe financimin e duhur për ekonominë prodhuese, uljen e taksave, luftën ndaj monopoleve dhe klientelizmit, si dhe mbështetjen dhe financimin e projekteve madhore ekonomike që do krijojnë punësim dhe mirëqënie për shqiptarët.”- tha kreu i opozitës Lulzim Basha.
