Sot, më 8 shtator, nis zyrtarisht viti i ri shkollor në të gjithë Shqipërinë, ku rreth 345 mijë nxënës do të ulen në bankat e shkollës, ndërsa 26.500 prej tyre do të fillojnë për herë të parë klasën e parë. Për këtë proces mësimor janë angazhuar 31 mijë mësues, ndërsa Ministria e Arsimit ka bërë të ditur se këtë vit është rritur ndjeshëm mbështetja për nxënësit me aftësi të kufizuara, duke shtuar 150 mësues ndihmës, në total 2,260. Për më tepër, transporti falas do të sigurohet për 38 mijë nxënës dhe 12 mijë mësues, ndërkohë që për nxënësit në nevojë janë vënë në dispozicion 3,500 bursa financiare.
Ky vit shkollor shënon gjithashtu hapjen e 30 shkollave të reja apo të rehabilituara dhe vendosjen në funksion të 340 laboratorëve SMART, që synojnë të përmirësojnë cilësinë e procesit mësimor. Nga ana tjetër, 236 mijë nxënës janë pajisur me libra falas, ndërsa sipas të dhënave të INSTAT, në vend funksionojnë rreth 1,000 shkolla 9-vjeçare publike dhe rreth 380 shkolla të mesme.
Sa i përket sigurisë në shkolla, Policia e Shtetit ka përgatitur një plan të detajuar me qëllim rritjen e pranisë së efektivëve pranë institucioneve arsimore, sidomos në oraret e nisjes, përfundimit të mësimit dhe pushimeve të mëdha. Në kuadër të këtij plani, do të mbyllen pikat ambulante që tregtojnë alkool dhe produkte ushqimore të skaduara pranë shkollave, ndërsa kontrolle të rrepta do të zhvillohen për nxënësit që mund të mbajnë sende të ndaluara, që shpesh janë shkak për incidente të ndryshme. Policia ka theksuar gjithashtu se do të monitorojë çdo informacion në lidhje me konflikte apo raste të bullizmit në ambientet shkollore.
Megjithatë, në këtë moment në terren janë vetëm 60 oficerë sigurie për të mbuluar rreth 1,400 institucione arsimore 9-vjeçare dhe të mesme, por ministrja e Arsimit ka njoftuar se nga muaji tetor do të angazhohen edhe 400 të tjerë, pasi të përfundojnë trajnimet përkatëse. Sidoqoftë, sipas një vendimi qeverie të prillit 2025, oficerët e sigurisë do të vendosen vetëm në shkollat 9-vjeçare me mbi 350 nxënës dhe në gjimnazet me mbi 80 nxënës, duke bërë që rreth 60 përqind e shkollave të mos kenë të tillë.
Një ndryshim i rëndësishëm vjen edhe për përdorimin e celularëve në shkolla. Nxënësit do të mund të sjellin celularin në shkollë vetëm nëse prindi e konsideron të domosdoshëm dhe e argumenton këtë në mënyrë të shkruar. Gjatë orës së mësimit, telefoni duhet të jetë i fikur ose në “airplane mode” dhe të vendoset në kutinë e posaçme të klasës. Në rast se nxënësi kapet duke përdorur telefonin fshehurazi, aparati do të sekuestrohet dhe do të dorëzohet në drejtori. Për shkeljen e parë, nxënësi do të këshillohet, ndërsa në rast përsëritjeje prindi do të njoftohet dhe vetëm ai do të mund ta marrë telefonin nga shkolla. Për më tepër, udhëzimi i ri i Ministrisë së Arsimit ndalon përdorimin e celularëve edhe nga vetë mësuesit, përveç në raste emergjente ose kur përdoren për nevoja të provuara pedagogjike.
Një tjetër risi e këtij viti është miratimi i Kodit të ri të Etikës për mësuesit parauniversitarë, që zëvendëson dokumentin e miratuar 12 vjet më parë. Ky kod përcakton rregulla të qarta për etikën profesionale, sjelljen dhe marrëdhëniet me nxënësit, prindërit dhe komunitetin, si dhe përdorimin e teknologjisë dhe rrjeteve sociale. Në mënyrë të veçantë, mësuesve u ndalohet postimi i imazheve apo videove që mund të kompromentojnë misionin e tyre edukativ, ndërsa theksohet se çdo ndërveprim në rrjete apo platforma sociale duhet të mbështetet në standarde etike të komunikimit në publik. Kodi i ri u jep rëndësi edhe pamjes dhe paraqitjes së jashtme të mësuesve, duke u kërkuar që të kenë një sjellje dhe paraqitje profesionale përballë nxënësve dhe komunitetit.
/Argumentum.al
