Presidenti i Shqipërisë, Bajram Begaj, mirëpriti Ambasadorin e ri të Palestinës në Shqipëri, z. Sami Mhanna, dhe pranoi zyrtarisht Letër-Kredencialet e tij. Gjatë takimit, Presidenti Begaj i uroi ambasadorit suksese në mandatin diplomatik, siç njoftoi edhe vetë në rrjetin social Twitter.
Ai riafirmoi qëndrimin e Shqipërisë në mbështetje të zgjidhjes me dy shtete dhe shprehu shpresën për paqe dhe prosperitet të qëndrueshëm në Lindjen e Mesme.
Nga ana e tij, ambasadori Sami Mhanna falënderoi për mikpritjen dhe theksoi gatishmërinë për të fuqizuar më tej marrëdhëniet diplomatike dhe bashkëpunimin mes dy vendeve.
Kush është Ambasadori Sami Mhanna?
Shkëlqesia e Tij, Sami Mhanna, është Ambasadori i sapoemëruar i Shtetit të Palestinës në Republikën e Shqipërisë. Me një karrierë diplomatike që përshkon pothuajse dy dekada, Ambasadori Mhanna sjell eksperiencë të gjerë në marrëdhëniet ndërkombëtare dhe njohuri të thella mbi çështjet komplekse të sigurisë në Lindjen e Mesme, si dhe përkushtim të palëkundur ndaj përfaqësimit të kauzës palestineze në arenën ndërkombëtare.
Karriera e tij diplomatike nisi në vitin 2006 në Ambasadën e Palestinës në Beograd, Serbi, ku filloi si Sekretar i Tretë dhe Sekretar për Media. Sekretar i Dytë për Çështjet Politike (2015–2019) dhe më pas si Sekretar i Parë (2019–2022). Në vitin 2023, u emërua si i Ngarkuar me Punë për një periudhë gjashtëmujore. Nga viti 2022 deri në 2025, ai mbajti detyrën e Këshilltarit Diplomatik në të njëjtën ambasadë.
Sa i përket formimit akademik, Ambasadori Mhanna ka një bazë të fortë në fushën e sigurisë dhe diplomacisë. Ai përfundoi studimet bachelor në Siguri dhe Diplomaci në vitin 2010, me tezën “Zhvillimi i çështjes palestineze”. Në vitin 2012 mori një master me fokus në “Institucioni palestinez në zgjidhjen e krizës në Lindjen e Mesme”. Më pas, në vitin 2018, kreu një master të dytë në Terrorizëm, Siguri dhe Krim të Organizuar në Universitetin e Beogradit, me temë “Krimi i organizuar në Lindjen e Mesme me fokus të veçantë në Somalinë”.
Kujtojmë se pas shpalljes së pavarësisë së Palestinës në vitin 1988, Shqipëria e njohu zyrtarisht shtetin palestinez, ndërsa në vitin 1989 u hap Ambasada e Palestinës në Tiranë. Marrëdhëniet ndërmjet dy vendeve u forcuan edhe më shumë me vizitën e Presidentit Yasser Arafat në vitin 1996.
/Argumentum.al
