Presidentja e Kosovës, Vjosa Osmani i ka bërë thirrje partive politike parlamentare që të konstituojnë Kuvendin e Kosovës. Ajo tha se të njëjtat duhet t’i lënë anash dallimet dhe të vendosin interesin e Kosovës të parin, duke krijuar një shumicë parlamentare që e çon vendin përpara.
Edhe gjashtë muaj pas zgjedhjeve parlamentare të 9 shkurtit, vendi nuk ka formuar institucionet e reja. Deputetët e Kuvendit dështuan javën e kaluar për herë të 58-të, të konstituojnë legjislaturën e nëntë, përkundër aktgjykimit të dytë të Gjykatës Kushtetuese.
Osmani në një intervistë për transmetuesin polak TVP World në Alpbach të Austrisë, tha se është fatkeqësi që populli ende nuk ka parlamentin për të cilin ka votuar dhe vullneti i tij nuk është materializuar.
Sipas saj, mungesa e marrëveshjes politike po ndodh për shkak të polarizimit dhe mungesës së besimit të ndërsjellë.
Osmani në intervistën për transmetuesin polak, foli edhe për integrimin e Kosovës në Bashkimin Evropian, ku theksoi se vendi është gati t’i bashkohet BE-së.
Duke folur për protestat në Serbi, presidentja Osmani tha se të njëjtat do të ndikojnë në të gjithë rajonin.
Sipas saj, presidenti i Serbisë, Aleksandër Vuçiq, sa herë ka probleme brenda vendit, përpiqet të shkaktojë probleme në Bosnje, Kosovë dhe rajon, për të përdorur kartën nacionaliste dhe për t’u shitur si shpëtimtar.
Osmani shtoi se Vuçiç gjithmonë ka bërë të kundërtën.
Krahas kësaj, Osmani theksoi rëndësinë që Kosova të përfitojë statusin vend kandidat për anëtarësim në Bashkimin Evropian./KosovaPress/
