Presidentja e Komisionit Evropian, Ursula von der Leyen, u vlerësua me Çmimin Ndërkombëtar Karli i Madh në Aachen. Politikania gjermane e mori çmimin në sallën e kurorëzimit të Bashkisë së Ahenit. Në fjalën e tij, Kancelari gjerman Friedrich Merz deklaroi se von der Leyen i jep Evropës një zë evropian në botë.
Gjatë fjalimit, Merzi bëri një mbrojtje të fortë të Bashkimit Evropian dhe vlerave të tij, në një kohë kur BE po përballet me sfida për shkak të sulmit kundër Ukrainës nga Rusia dhe tensioneve me administratën e Presidentit të SHBA Donald Trump.
Merzi pohoi se Evropa mbështet bindjen se për lirinë dhe demokracinë ia vlen të luftohet.
Ai e përshkroi Bashkimin Evropian si një “projekt evropian paqeje” dhe pohoi se ai duhet të jetë i fortë jo vetëm brenda, por edhe jashtë tij.
Merz pohoi se Evropa duhet të bëhet aq e fortë “sa të mund të rivendosë paqen në kontinentin tonë dhe të garantojë lirinë në planin afatgjatë”. Ai pohoi se Gjermania do të vazhdojë të mbështesë Ukrainën jo vetëm ushtarakisht, por edhe ekonomikisht dhe politikisht.
Kancelari gjerman pohoi se Gjermania është e gatshme të marrë vendime “largvajtëse” në samitin e NATO-s në qershor, për të forcuar sigurinë evropiane dhe marrëdhënien transatlantike me SHBA.
Projekti i ardhshëm i madh unifikues – një Evropë e pavarur
Sipas Merzit, Çmimi i Karlit të Madh është plotësisht i merituar. Ai është i bindur se ne kemi çdo mundësi për të formësuar të ardhmen e Evropës në mënyrë që ajo të jetë një e ardhme e mirë. Është një Evropë që vazhdon t’u shërbejë njerëzve dhe të mbrojë lirinë e tyre.
Pas fjalimit të Merzit, Von der Leyen mori Çmimin e Karlit të Madh. Ajo foli për kuptimin që ka për të Evropa dhe si e sheh ajo të ardhmen e kontinentit. Më tej, von der Leyen bëri thirrje për ndërtimin e një “Evrope të pavarur”.
“Epoka e ardhshme e madhe, projekti ynë i ardhshëm i madh unifikues, duhet të jetë një Evropë e pavarur”, deklaroi Von der Leyen.
Sipas saj, kjo vlen jo vetëm për vendet e Bashkimit Evropian, por edhe për vendet në të gjithë kontinentin.
Përballë tensioneve “të mëdha” gjeopolitike, von der Leyen deklaroi se “ajo që dikur e merrnim si të mirëqenë si një rend ndërkombëtar është transformuar në kaos ndërkombëtar në një kohë shumë të shkurtër”.
Ajo deklaroi se Evropa duhet të “marrë çështjet në duart e saj”. Sipas saj, rendi botëror karakterizohet përsëri nga “përpjekjet perandorake për pushtet dhe luftërat perandorake”. Komentet e saj vijnë mes pushtimit të Ukrainës nga Rusia dhe dyshimeve të ushqyera nga Presidenti i SHBA-së Donald Trump në lidhje me të ardhmen e aleancës transatlantike të NATO-s.
Në fjalimin e tij, Mbreti Felipe VI i Spanjës hodhi poshtë thirrjet për shpërbërjen e Bashkimit Evropian. Ne duhet t’u japim përgjigje zërave të rrezikshëm që argumentojnë se evropianët do të ishin më të lirë, të pavarur dhe sovranë, po të jetonin të ndarë në kombe të veçuar, tha Mbreti Felipe VI.
Çmimi Ndërkombëtar i Karlit të Madh i Aachenit jepet që nga viti 1950 dhe konsiderohet nderi më i lartë për meritat në mbështetje të unitetit evropian. Këtë vit, për herë të parë, ai shoqërohet me një milion euro, të cilat do të investohen në projekte proevropiane./DW
