Kryeministri në detyrë i Kosovës, Albin Kurti ka thënë se Qeveria Kurti ka përfaqësuar popullin dhe këtë e ka dëshmuar puna e ministrive.
Kurti ka thënë se në këto 100 ditët qeverisje ishte intervenim i shpejtë i ndaljes së humbjes së madhe të parasë publike, dhe fillimi i një shteti bazuar në vlera, njofton Klan Kosova.
Ai konfirmoi se në këto 100 ditë janë marrë 192 vendime nga Qeveria në udhëheqjen e tij.
”Pa humbur kohë kemi filluar me luftimin e korrupsionit, humbjen e parasë publike si dhe me çkapjen e shtetit nga zhvatja”.
”Veprimi i parë ishte marrja e një sërë vendimesh që do të shërbenin në të mirën e shtetit dhe qytetarit”.
”Përmes këtyre vendimeve jemi duke ndalur një praktikë, ku Qeveritë e kaluara i përdornin taksat e qytetarëve për përfitimet e tyre partiake”.
Kurti, ka thënë në raportimin për 100 ditëshin e qeverisjes se nga sulmet që i janë bërë atij më së shumti ka humbur shteti.
Në mbledhjen e Qeverisë, Kurti ka thënë se është për zgjedhje të reja dhe se Qeverinë do ta drejtojë deri atëherë, njofton Klan Kosova.
“Është për keqardhje dhe turp trajtimi që i është Qeverisë dhe Kryeministrit nga Presidenti dhe regjimi i vjetër. Nga këto më së paku kam humbur unë, e më së shumti shteti. Këta shtetin e japin. Kanë humbur”, është shprehur ai.
“Në këto 100, çkapja e shtetit nga mujsharët ka filluar dhe nuk do të ndalet. Ka edhe parti që po kërkojnë zgjedhje. Qeveria do të mbetet në detyrë deri në zgjedhjet e reja”.
“Qeveria u rrëzua por një popull i tërë u ngrit. Jam i mbushur me shpresë më shumë se kurrë. Ajo që më jep shpresë është shpirti i qytetarëve të zgjuar. Besimi që kanë në vetën e tyre dhe Qeverinë e tyre”.
