Kryetari i Lëvizjes Vetëvendosje, Albin Kurti ka dënuar vendimin e Presidentit, Hashim Thaçi për të mos thënë dorëheqjen para paraqitjes në Hagë, ku akuzohet nga Prokuroria Speciale për krime lufte. Këtë deklaratë, Kurti e bëri në një video ku gjithashtu shprehur kritika ndaj qeverisë “Hoti” për menaxhimin që i ka bërë pandemisë.
“Kosova sot është në gjendje të rëndë sepse kriza është e trefishtë: shëndetësia, demokracia dhe ekonomia e vendit tonë janë në krizë të thellë. Besueshmëria për këtë qeveri është tejet e ulët. Pritjet nga kjo qeveri, edhe më të ulta. Kjo qeveri do të mbahet mend si më e dobëta dhe më e mbrapshta e pasluftës, krahasimi me të cilën s’do t’i bëjë nder asnjë qeverie në të ardhmen”, tha Kurti.
Ish-kryeministri ka komentuar dhe mundësinë për të shpallur gjendjen e jashtëzakonshme duke thënë se, në bazë të Kushtetutës, gjendjen e jashtëzakonshme e shpall Presidenti dhe më pas dekreti kalon për miratim në Kuvend.
“Pse kjo qeveri na kërcënon me shpallje të gjendjes së jashtëzakonshme? Çfarë pune ka ajo me këtë shpallje? Vetëm një shpjegim e ka kjo: kryeministri koti është zëdhënës i presidencës, vegël e Thaçit, e i cili karrigen e presidentit të Republikës e mori me vete para prokurorisë speciale në Hagë”, tha z. Kurti.
“Në republikë, sovran është shteti e burim i sovranitetit populli; në monarki, sovran është mbreti. Presidenti nuk është sovrani. Ai nuk mund ta marrë me vete karrigen presidenciale e ta çojë në prokurori a gjykatë. Kosova nuk ua ka pasur borxh këtë’, ka shtuar kreu i VV-së.
Në fund, Kurti thotë se, përballë paaftësisë së qeverisë u ka bërë thirrje qytetarëve që të kujdesen për shëndetin e tyre, ndërsa i ka shprehur shërim të shpejtë deputetëve të infektuar me COVID-19 dhe kryetarit të LDK-së, Isa Mustafa.
“Përballë paaftësisë së qeverisë për të qeverisur, le të kujdesemi ne vetë për jetën dhe shëndetin e të gjithëve. Me këtë rast, u shpreh ngushëllime të gjithë familjarëve të të vdekurve nga virusi corona dhe ju dëshiroj shërim të shpejtë e të plotë secilit qytetar të sëmurë, deputetëve të infektuar si dhe kryetarit të LDK-së, Mustafa”, tha kreu i VV-së.
