Këshilli Evropian (KE) ka miratuar masën e dytë të ndihmës ndaj Shqipërisë prej 15 milionë eurosh, në kuadër të Mekanizmit Evropian të Paqes, me qëllim forcimin e kapaciteteve dhe aftësive mbrojtëse të Forcave të Armatosura Shqiptare.
Theksohet se me miratimin e ri, KE-ja e çon shumën e përgjithshme të mbështetjes për Shqipërinë në 28 milionë euro deri më sot në kuadër të këtij mekanizmi.
“Këshilli miratoi sot masën e dytë të ndihmës dypalëshe në kuadër të Mekanizmit Evropian të Paqes prej 15 milionë eurosh, me qëllim forcimin e kapaciteteve dhe aftësive mbrojtëse të Forcave të Armatosura Shqiptare, duke e çuar shumën e përgjithshme të mbështetjes për Shqipërinë në 28 milionë euro deri më sot. Vendimi plotëson mbështetjen e ofruar tashmë nga BE-ja dhe synon të forcojë më tej dislokueshmërinë e Forcave të Armatosura Shqiptare”, thuhet në një njoftim të publikuar nga Delegacioni i Bashkimit Evropian në Shqipëri.
Gjithashtu thuhet se masa e ndihmës do të rrisë gjithashtu potencialin e Shqipërisë për të kontribuar në operacionet dhe misionet e Politikës së Përbashkët të Sigurisë dhe Mbrojtjes (CSDP) të BE-së, si dhe në koalicionet ndërkombëtare
“Vendimi i sotëm ilustron angazhimin e fortë dhe të vazhdueshëm të BE-së me Shqipërinë në fushën e sigurisë dhe mbrojtjes. Ai pasqyron gjithashtu angazhimin e ndërsjellë për të forcuar bashkëpunimin në këtë fushë, duke u bazuar te nënshkrimi i Partneritetit të Sigurisë dhe Mbrojtjes mes BE-së dhe Shqipërisë në nëntor 2024 dhe çelja e Dialogut të parë të Sigurisë dhe Mbrojtjes në prill 2025. Miratimi i një pakete të re mbështetëse njeh përputhshmërinë e plotë të Shqipërisë me Politikën e Përbashkët të Jashtme dhe të Sigurisë të BE-së”, thuhet në njoftim.
Më tej theksohet se përmes masës së Mekanizmit Evropian të Paqes, BE-ja do t’u ofrojë Forcave të Armatosura Shqiptare automjete të lehta të blinduara shumëfunksionale, si dhe automjete taktike dhe inxhinierike dhe kur është e nevojshme, furnizime dhe shërbime përkatëse, përfshirë trajnim operativ dhe të mirëmbajtjes.
Sipas BE-së, Mekanizmi Evropian i Paqes u krijua në mars të vitit 2021 për financimin e masave në kuadër të politikës së përbashkët të jashtme dhe të sigurisë për parandalimin e konflikteve, për ruajtjen e paqes dhe për forcimin e sigurisë dhe stabilitetit ndërkombëtar.
