Patriarku i Kishës Ortodokse Serbe, Irinej ka vdekur si pasojë e infektimit me koronavirusin e ri, që e shkakton sëmundjen COVID-19.
Irinej u shtrua në një spital ushtarak të Beogradit gjatë mbrëmjes së 4 nëntorit, pasi më parë kishte dalë pozitiv në COVID-19.
Kisha Ortodokse Serbe njoftoi më 17 nëntor se gjendja e patriarkut ishte stabile dhe e qëndrueshme, por më pas, më 19 nëntor, Kisha Ortodokse konfirmoi përmes një deklarate se gjendja e Irinejt ishte përkeqësuar.
Presidenti i Serbisë, Aleksandar Vuçiq, shkroi në llogarinë e tij në Instagram se ishte i nderuar që e njohu patriarkun. “Njerëz si ju kurrë nuk largohen”, shkroi Vuçiq me një foto bardh e zi të Patriarkut Irinej.
Më 1 nëntor, kreu i Kishës Ortodokse Serbe, Irinej, udhëhoqi funeralin dhe liturgjinë para varrimit të Metropolitit Amfilohije të Malit të Zi, e cila u ndoq nga mijëra besimtarë. Metropoliti Amfilohije ndërroi jetë më 30 tetor për shkak të ndërlikimeve të shkaktuara nga koronavirusi.
Në varrim, ku ishte ekspozuar arkivoli i hapur me trupin e mitropolitit, priftërinjtë, shumica e besimtarëve, si dhe disa politikanë, nuk bartnin maska dhe nuk respektuan distancën fizike.
Priftërinjtë kanë kunguar besimtarët me të njëjtën lugë, ndërkaq që disa nga të pranishmit në procesion, puthën dorën e të ndjerit, trupi i të cilit ishte ekspozuar në arkivol të hapur.
Irinej (90 vjeç) u zgjodh në postin më të lartë në Kishën Ortodokse Serbe, në janar të vitit 2010.
