Ambasadorja e SHBA-së në Tiranë, Yuri Kim ka përshëndetur sot dekretin e Presidentit Meta për emërimin e Sokol Ngresit si gjyqtar të Gjykatës së Lartë.
Ambasadorja Yuri Kim e konsideron një hap të rëndësishëm emërimin e gjyqtarit të 13-të të Gjykatës së Lartë.
“Hap i madh përpara për reformën në drejtësi: Gjyqtari i 13-të i Gjykatës së Lartë u dekretua sot, duke bërë të mundur që dhomat e bashkuara të arrijnë përfundimisht kuorumin pas 5 vitesh. Kjo do të thotë se Gjykata e Lartë tani është në gjendje të kryejë të gjitha funksionet, të shqyrtojë më shumë raste dhe të ndryshojë ligjet gjyqësore në mënyrë racionale”, thekson Kim në një reagim në rrjetet sociale.
Ajo shton se “ky hap i madh është falë bashkëpunimit të mirë të drejtësisë mes institucioneve dhe Presidencës. Shpresojmë që kjo të vazhdojë. Reforma në drejtësi nuk ka qenë e lehtë, e shpejtë apo e përsosur, por definitivisht po ecën përpara dhe po prodhon rezultate reale”.
Presidenti Meta dekretoi sot emërimin e Sokol Ngresit si gjyqtar të Gjykatës së Lartë.
