Pesë komunitetet fetare të bashkuara në Këshillin Ndërfetar të Shqipërisë kanë reaguar sot ndaj disa përkufizimeve të përfshira në projektligjin “Për barazinë gjinore” duke i cilësuar ato në kundërshtim me parimet e tyre fetare dhe traditën e familjes shqiptare
Në një mbledhje të posaçme të Bordit të Presidencës së Këshillit Ndërfetar së bashku me një grup pune të përbërë nga ekspertë të pesë komuniteteve u theksua se termat si “gjini” në kuptimin gjithëpërfshirës si dhe “identitet gjinor” dhe “shprehje gjinore” krijojnë paqartësi ligjore dhe hapësira për keqinterpretim
Komunitetet fetare kërkojnë që në projektligj të saktësohet qartë se gjinia lidhet me atë të përcaktuar në lindje burrë dhe grua duke mbështetur konceptin e familjes tradicionale si bazë e shoqërisë shqiptare
Në deklaratë theksohet se kjo qasje nuk bie ndesh me procesin e integrimit evropian pasi edhe shumica e vendeve të Bashkimit Evropian vijojnë të përdorin përkufizime binare për gjininë
Komunitetet riafirmojnë angazhimin për dialog dhe bashkëpunim me institucionet në ndërtimin e një shoqërie të drejtë dhe të barabartë të mbështetur në besimin te Zoti dhe në respektin për ligjin
Deklarata është firmosur nga drejtuesit e Komunitetit Mysliman të Shqipërisë Kishës Orthodhokse Autoqefale Kishës Katolike Kryegjyshatës Botërore Bektashiane dhe Vëllazërisë Ungjillore të Shqipërisë.
DEKLARATA
Komunitetet fetare në Shqipëri vlerësojnë rëndësinë e barazisë në përfshirjen sociale dhe në mosdiskriminim, sepse kjo pasqyron barazinë e dinjitetit, që të gjithë njerëzit kanë përpara Zotit.
Nisur nga këto parime dhe bazuar në të drejtat e tij statutore, Këshilli Ndërfetar i Shqipërisë, i përbërë nga pesë komunitetet fetare (Komuniteti Mysliman i Shqipërisë, Kisha Orthodhokse Autoqefale e Shqipërisë, Kisha Katolike në Shqipëri, Kryegjyshata Botërore Bektashiane, Vëllazëria Ungjillore e Shqipërisë), pasi u njoh me projektligjin “Për barazinë gjinore”, mblodhi sot më 23 shtator 2025 Bordin e Presidencës, së bashku me një grup pune të miratuar nga pesë komunitetet fetare, të përbërë nga specialistë dhe ekspertë të fushave të ndryshme.
Krerët dhe drejtuesit e të gjitha komuniteteve fetare shprehën shqetësimin e tyre për disa nene dhe përkufizime të projektligjit, të cilat bien në kundërshtim me parimet teologjike dhe traditën e familjes shqiptare. Në veçanti, përkufizimi i termit “gjini”, si koncept gjithëpërfshirës, përdorimi i nocioneve, “identitet gjinor”, “shprehje gjinore”, si dhe të gjitha neneve të tjera të lidhura me to, krijojnë paqartësi ligjore dhe hapësira për keqinterpretim.
Ne, si komunitete fetare, theksojmë rëndësinë e familjes tradicionale të bazuar mbi dy gjinitë biologjike: burrë dhe grua. Për këtë arsye, kërkojmë saktësimin e përkufizimit të termit “Gjini” në projektligj, duke e lidhur qartë me gjininë e përcaktuar në lindje – burrë, grua, vajzë, djalë – në përputhje me parimet e barazisë dhe mosdiskriminimit.
Komunitetet fetare kanë mbështetur gjithmonë përpjekjet e Shqipërisë për përafrimin e legjislacionit me direktivat e Bashkimit Evropian. Njohja tradicionale e dy gjinive nuk përbën pengesë për këtë proces – fakt që reflektohet edhe në praktikat e shumicës së shteteve anëtare të BE-së, të cilat vazhdojnë të përdorin një përkufizim binar burrë–grua.
Me dëshirën që këto shqetësime të merren në konsideratë nga institucionet përgjegjëse, riafirmojmë angazhimin tonë për dialog dhe bashkëpunim në ndërtimin e një shoqërie të drejtë, të barabartë dhe të sigurt për brezat e rinj, duke u mbështetur në besimin te Zoti dhe respektin për ligjin.
Zoti e bekoftë Shqipërinë dhe të gjithë qytetarët e saj!
Bordi i Presidencës së Këshillit Ndërfetar të Shqipërisë
Haxhi Bujar Spahiu, Kryetar i Komunitetit Mysliman të Shqipërisë
Fortlumturia e Tij, Joani, Kryepiskop i Kishës Orthodhokse Autoqefale të Shqipërisë
Imzot Gjergj Meta, Kryetar i Konferencës Ipeshkvnore të Shqipërisë
Haxhi Dede Edmond Brahimaj, Kryegjysh Botëror i Kryegjyshatës Bektashiane
Pastor Ergest Biti, Kryetar i Vëllazërisë Ungjillore të Shqipërisë
/Argumentum.al
