Kryeministri i Shqipërisë, Edi Rama, zhvilloi një bisedë telefonike me presidentin e Turqisë, Recep Tayyip Erdoğan, në prag të zgjedhjeve parlamentare që do të mbahen nesër në Shqipëri. Sipas njoftimit të Drejtorisë së Komunikimit të Presidencës turke, gjatë bisedës është diskutuar për marrëdhëniet dypalëshe, çështjet rajonale dhe zhvillimet globale.
Presidenti Erdoğan vlerësoi miqësinë mes dy vendeve dhe theksoi se bashkëpunimi midis Turqisë dhe Shqipërisë do të vazhdojë të forcohet në periudhën e ardhshme. Ai gjithashtu përgëzoi Shqipërinë për organizimin e samiteve të Komunitetit Politik Evropian dhe Procesit të Bashkëpunimit të Evropës Juglindore, duke e cilësuar këtë si dëshmi të profilit ndërkombëtar në rritje të vendit. Ndër të tjera, ai shprehu urimet që zgjedhjet e ardhshme parlamentare në Shqipëri të jenë të mbarë.
Ajo që bie në sy është fakti se kjo telefonatë ndodhi vetëm një ditë para zgjedhjeve, në të cilat kryeministri Rama kërkon mandatin e tij të katërt. Kjo nuk është hera e parë që presidenti turk shpreh publikisht vlerësime apo sinjale mbështetëse ndaj Ramës në një moment zgjedhor. Edhe në zgjedhjet parlamentare të vitit 2021, u shënua një episod i ngjashëm që u interpretua gjerësisht si një ndërhyrje simbolike me peshë politike.
Më konkretisht, në Prill 2021, vetëm pak muaj para zgjedhjeve, Erdoğan mori pjesë virtualisht në ceremoninë e përurimit të spitalit rajonal të Fierit — një projekt i financuar nga qeveria turke në bashkëpunim të ngushtë me qeverinë shqiptare. Në atë rast, presidenti turk lavdëroi drejtpërdrejt kryeministrin Rama për udhëheqjen e vendit dhe bashkëpunimin e suksesshëm mes dy qeverive. Kjo u interpretua në mediat shqiptare dhe ndërkombëtare si një lloj sinjali politik që mund të ndikonte opinionin publik në favor të Ramës vetëm katër ditë para zgjedhjeve parlamentare.
Ndërkohë që marrëdhëniet e ngushta personale dhe institucionale midis dy liderëve janë të njohura publikisht, duhet theksuar se ndërhyrje të tilla në prag të zgjedhjeve mund të perceptohen si përfshirje e jashtme në procesin demokratik të një vendi sovran. Këto simbolika, pavarësisht synimeve, rrezikojnë të minojnë parimet e barazisë dhe pavarësisë politike, dhe mund të cenojnë balancën e marrëdhënieve strategjike dypalëshe në një afat të gjatë.
Në këtë kontekst, është e rëndësishme që diplomacia të mos tejkalojë kufijtë simbolikë të mbështetjes institucionale dhe të ruajë një balancë që nuk ndikon apo nuk perceptohet si ndërhyrje në proceset e brendshme politike të një shteti tjetër. Shqipëria, si një vend që synon të avancojë në procesin e integrimit evropian dhe të ruajë marrëdhënie të balancuara me të gjitha palët strategjike, duhet të jetë veçanërisht e kujdesshme ndaj këtyre sinjaleve që, edhe pse ndoshta jo të qëllimshme, mund të interpretohen si të motivuara politikisht.
/Argumentum.al
