Ministri i Jashtëm gjerman, Johann Wadephul, shpreson që marrëveshjet e tregtisë së lirë me vendet e Amerikës Latine dhe Indinë të përfundojnë deri në fund të vitit.
“Do të ishte një parakusht i rëndësishëm, jo vetëm për shkëmbimin e mallrave dhe shërbimeve me këto vende, por gjithashtu do të tregonte që Bashkimi Evropian është në gjendje të veprojë si një faktor gjeopolitik”, tha Wadephul gjatë një takimi sot me ambasadorët gjermanë në Berlin.
“Demonstrimi i kësaj kapaciteti për veprim nuk ka qenë kurrë më urgjent se sa është tani”.
Komentet e tij vijnë ndërsa Bashkimi Evropian kërkon partneritete të reja pas valës së tarifave të vendosura nga presidenti amerikan, Donald Trump.
Java e kaluar, Komisioni Evropian i kërkoi 27 shteteve anëtare të BE-së të miratojnë dy marrëveshje të mëdha, por të diskutueshme, për tregti të lirë me vendet e Amerikës Latine.
Negociatat e BE-së me zonën tregtare “Mercosur”, që përfshin Argjentinën, Brazilin, Paraguajin dhe Uruguain, u përfunduan në dhjetor pas më shumë se 25 vitesh bisedimesh, duke krijuar një nga zonat më të mëdha të tregtisë së lirë në botë me 700 milion banorë.
Marrëveshja me “Mercosur” synon të rrisë volumin vjetor të eksportit të BE-së deri në 49 milion euro (57.1 miliardë dollarë) përmes uljes së tarifave mbi produkte si makina, makineri dhe ilaçe. Nga ana tjetër, këto katër vende të Amerikës së Jugut do të lejohen të shesin më shumë produkte bujqësore në BE.
Një marrëveshje e veçantë me Meksikën zgjeron një marrëveshje ekzistuese, duke synuar heqjen e barrierave të importit për produktet bujqësore të BE-së dhe duke lejuar bllokun të importojë më shumë lëndë të para kritike nga Meksika./dpa-argumentum.al
