Sekretari i Përgjithshëm i NATO-s, Mark Rutte, tha se bisedimet e ardhshme të paqes për luftën në Ukrainë ka gjasa të duhet të trajtojnë fatin e territoreve që aktualisht janë nën kontrollin e Rusisë.
“Duhet të pranojmë në këtë moment se Rusia po kontrollon një pjesë të territorit të Ukrainës”, tha mbrëmë Rutte për rrjetin amerikan “ABC News”. Ai shtoi se pas një armëpushimi, diskutimet do të përqendroheshin në çështjet territoriale dhe garancitë e mundshme të sigurisë për Ukrainën.
Në të njëjtën kohë, Rutte theksoi sovranitetin e Ukrainës dhe të drejtën e saj për të përcaktuar të ardhmen e vet gjeopolitike.
Ai nënvizoi dallimin midis njohjes “de facto” dhe “de jure” në çështjet territoriale. Një marrëveshje e mundshme mund të pranonte kontrollin faktik të Rusisë mbi disa zona pa e njohur ligjërisht atë, duke përmendur si shembull mosnjohjen nga Perëndimi të okupimit sovjetik të shteteve baltike nga viti 1940 deri në 1991.
Presidenti amerikan Donald Trump pritet të takohet me presidentin rus Vladimir Putin në Alaskë të premten, për të diskutuar një zgjidhje të mundshme diplomatike për konfliktin pothuajse tre vjeç e gjysmë.
Rutte vlerësoi përpjekjet e Trump-it, duke thënë se “e premtja e ardhshme do të jetë e rëndësishme sepse do të ketë të bëjë me testimin e seriozitetit të Putinit për t’i dhënë fund kësaj lufte të tmerrshme.”
Presidenti ukrainas Volodymyr Zelensky nuk është ftuar në bisedimet e Alaskës. Ai dhe partnerët perëndimorë kanë frikë se vendimet mund të merren pa pjesëmarrjen e Ukrainës. Së fundmi, Zelensky ka deklaruar se do të refuzonte çdo shkëmbim territoresh.
