Kryeministri i Belgjikës, Bart De Wever bëri thirrje për një forcë më të madhe strategjike në Evropë, duke përmendur dallimet në rritje me SHBA-në mbi mbështetjen për Ukrainën.
Duke folur përpara samitit të Këshillit Evropian në Bruksel, De Wever tha se ndërsa Evropa nuk është e përjashtuar nga diskutimet, ka një divergjencë të qartë në pikëpamje.
“Ne nuk jemi të përjashtuar nga tavolina e bisedimeve, por është e qartë se nuk kemi më të njëjtin këndvështrim për Ukrainën dhe mendoj se Evropa duhet të nxjerrë mësim prej saj, se duhet të bëhet strategjikisht më e fortë”, tha ai.
De Wever paralajmëroi se Evropës ende i mungon kapaciteti për të zëvendësuar praninë amerikane në terren, duke e bërë thelbësor angazhimin e vazhdueshëm amerikan.
“Shpresojmë t’i mbajmë ata në bord sa më shumë që të jetë e mundur. Por, është e qartë se qëndrimi pro-Ukrainë është më i hapur në Evropë sesa në SHBA, për fat të keq”, shtoi ai.
Duke komentuar rezultatin e Samitit të fundit të NATO-s në Hagë, kryeministri belg tha se Belgjika është e kënaqur me marrëveshjen për të lejuar më shumë fleksibilitet në shpenzimet e mbrojtjes.
“Nuk jemi aq të lumtur që duhet të shpenzojmë kaq shumë më tepër, por e kuptojmë se është e nevojshme”, tha De Wever.
