Çmimi Nobel për Paqen, i kërkuar nga presidenti amerikan, Donald Trump, është i mundur vetëm nëse ai i jep fund këtij konflikti midis Izraelit dhe palestinezëve, deklaroi sot presidenti francez, Emmanuel Macron gjatë një interviste me BFMTV nga Nju Jorku.
“Shoh një president amerikan që është i mobilizuar, i cili e përsëriti këtë mëngjes në podiumin e Kombeve të Bashkuara: Dua paqe. Kam zgjidhur shtatë konflikte. Kush e dëshiron çmimin Nobel për Paqen? Çmimi Nobel për Paqen është i mundur vetëm nëse i jepni fund këtij konflikti”, deklaroi Emmanuel Macron.
“Duhet të bësh presion mbi qeverinë izraelite që ajo të ndalojë, të ndalojë konfliktin në Gaza, në mënyrë që më në fund të lirojmë pengjet” e mbajtura nga grupi militant palestinez Hamas, tha ai.
Makron pranoi se edhe pas njohjes së tij në emër të Francës të një shteti palestinez në Asamblenë e Përgjithshme – një vendim i kundërshtuar ashpër si nga Trump ashtu edhe nga Izraeli – ishte Uashingtoni që kishte ndikim mbi Izraelin.
“Pse mund të bëjë ai (presidenti amerikan) më shumë se ne? Ne nuk i dorëzojmë armë (Izraelit) që lejojnë zhvillimin e konfliktit në Gaza”, tha Macron.
Presidenti francez deklaroi gjithashtu se shteti i Palestinës, i njohur zyrtarisht dje nga Franca, do të themelohet vërtet ditën kur shteti i Izraelit do ta njohë atë”.
/Argumentum.al
