Ministri i Jashtëm i Turqisë, Hakan Fidan në lidhje me luftën Rusi-Ukrainë tha se “Ose do të mbyllim sytë ndaj vazhdimit të kësaj lufte ose do të arrijmë paqe të përhershme këtë vit”.
Fidan foli në një konferencë të përbashkët për media pas takimit të tij me ministrin e Jashtëm ukrainas, Andrii Sybiha në kryeqytetin e Ukrainës, Kiev.
“Në luftën Rusi-Ukrainë është afruar një udhëkryq kritik”, tha Fidan duke iu referuar negociatave të paqes të mbajtura në Stamboll më 16 maj. “Siç e tregova në fillim të negociatave, ka dy rrugë para nesh. Ose do të mbyllim sytë ndaj vazhdimit të kësaj lufte ose do të arrijmë paqe të përhershme këtë vit. Për sa i përket Turqinë, rruga e vetme është arritja e një paqeje të drejtë dhe të përhershme me shpejtësi përmes dialogut dhe përfundimi i luftës”, tha ai.
Fidan theksoi se negociatat e paqes në Stamboll u konsideruan një fillim i ri. “Përfundimi i shpejtë i marrëveshjes së shkëmbimit të arritur në Stamboll vërtetoi se negociatat mund të japin rezultate konkrete. Ne duam që vrulli i arritur në Stamboll të vazhdojë”, tha ai.
Fidan theksoi se Turqia mbështet plotësisht integritetin territorial, pavarësinë dhe sovranitetin e Ukrainës. Fokusi qendror i vizitës aktuale është t’i jepet fund shkatërrimit dhe vuajtjeve njerëzore të shkaktuara nga lufta.
Ministri gjithashtu vuri në dukje se Rusia kishte shprehur gatishmërinë e saj për të vazhduar negociatat më 2 qershor, me diskutimet mbi takimin e ardhshëm që po zhvillohen aktualisht në Kiev.
“Ne besojmë se raundi tjetër mund të vazhdojë bazuar në një vendim themelor të marrë nga palët në Stamboll… Ne jemi të përgatitur për bisedime të mëtejshme dhe duam që lufta midis Ukrainës dhe Rusisë të përfundojë në mënyrë të drejtë dhe përfundimtare sa më shpejt të jetë e mundur”, deklaroi Fidan.
Duke iu përgjigjur pyetjeve të gazetarëve, Ministri i Jashtëm turk ndau pritjet e tij për raundin e ardhshëm të negociatave në Stamboll.
“Shpresojmë që pjesa më e madhe e punës teknike të përfundojë. Në fazën tjetër, duhet të bëjmë përparim të konsiderueshëm për të mbajtur një takim informues dhe, më e rëndësishmja, të arrijmë një marrëveshje për një armëpushim afatgjatë”, tha ai.
Fidan gjithashtu sugjeroi mundësinë e një takimi të ardhshëm të nivelit të lartë midis udhëheqësve të Ukrainës, Shteteve të Bashkuara, Turqisë dhe Rusisë në një vend negociatash në Stamboll.
Siç është raportuar, të mërkurën, më 28 maj, Ministri i Jashtëm rus Sergei Lavrov njoftoi se Moska propozoi mbajtjen e një raundi të dytë bisedimesh midis delegacioneve ruse dhe ukrainase në Stamboll më 2 qershor.
Ministri i Jashtëm ukrainas Andrii Sybiha i bëri thirrje Rusisë që menjëherë t’i ofrojë Ukrainës “memorandumin” e saj me propozime për armëpushim, në vend që të presë deri të hënën.
Të enjten, Presidenti Volodymyr Zelensky deklaroi se Rusia ende nuk ia ka paraqitur Ukrainës dhe partnerëve të saj ndërkombëtarë memorandumin e saj me propozime për armëpushim.
/Argumentum.al
