Jane 64 mijë e 964 individë që kanë përfituar “pagën e luftës”prej 26 mijë lekësh nga paketa e parë dhe 109 mijë e 664 që kanë përfituar bonusin prej 40 mijë lekësh nga paketa e zgjeruar.
Ministrja e Financave dhe Ekonomisë, Anila Denaj si dhe drejtorja e përgjithshme e Tatimeve, Delina Ibrahimaj, nisën sot turin e takimeve me bizneset, të cilat janë hapur dhe po zhvillojnë aktivitetin e tyre duke zbatuar masat kundër COVID-19.
“Kemi nisur disa takime me biznesin. E kemi filluar me biznesin e vogël. Pjesa më e madhe e tyre kanë qenë të mbyllura dhe kanë përfituar edhe “pagën e dytë të luftës” nga paketa e parë“, tha Denaj.
Ministrja tha se punonjësit e prekur në punën e tyre në situatën e krijuar prej COVID-19 janë të mbuluar me pagën e punës deri në fund të qershorit.
Sipas saj, jo të gjithë individët kanë arritur që brenda afatit të marrin bonusin prej 40 mijë lekësh, miratuar në paketën e zgjeruar. “Kemi propozuar disa ndryshime procedurale që do të tejkalojnë edhe disa vështirësi operacionale”, tha Denaj.
Drejtorja e përgjithshme e Tatimeve, Delina Ibrahimaj u shpreh se e kemi ndjekur me shumë kujdes të gjithë procesin e ankesave të ardhura si nga individët, ashtu edhe tatimpaguesit të cilët nuk kanë mundur të aplikojnë e të përfitojnë nga paketa e dytë.
“Numri total i të larguarve nga puna në periudhën mars-prill llogaritet 38 mijë dhe kemi bërë të mundur që edhe këta individë të përfitojnë nga paga e luftës. DPT do të afishojë në faqen e vet zyrtare të gjithë tatimpaguesit dhe punonjësit që janë përfitues dhe do të kenë kohë deri në 5 qershor që të aplikojnë në e-filing. Nëse deri më 5 qershor bizneset nuk aplikojnë do të bëhet kalimi automatikisht i pagës së luftës për punonjësit, duke arritur numrin 176 mijë persona”, tha Ibrahimaj. /
