Dy ditë para përvjetorit të parë të pushtimit rus të Kievit, Papa Françesku tha se lufta në Ukrainë është “absurde dhe mizore”, dhe bëri thirrje për armëpushim dhe negociata.
Gjatë fjalimit javor të 22 shkurtit, Papa e quajti njëvjetorin e luftës “përvjetor të trishtuar” dhe tha se është afër popullit ukrainas.
Ai tha se “fitorja e vërtetë” në Ukrainë “nuk mund të ndërtohet mbi rrënoja”.
Edhe në fjalimin e tij të Krishtlindjes më 25 dhjetor, Papa kishte bërë thirrje për përfundimin e menjëhershëm të luftës.
Papa e ka konsideruar luftën në Ukrain si “çmenduri”.
Vitin e kaluar ai kishte deklaruar se “të pafajshmit e paguajnë luftën”, dhe se tregtarët e armëve që përfitojnë nga lufta janë “delikuentë që vrasin njerëzimin”.
Presidenti rus, Vladimir Putin, ka urdhëruar pushtimin e Ukrainës më 24 shkurt.
Ai e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Që nga fillimi i luftës, Papa ka bërë thirrje të panumërta për paqe dhe për t’i dhënë fund dhunës duke marrë jetë të panumërta dhe duke plagosur shumë njerëz të tjerë.
Papa Françesku ka shprehur gjithmonë disponueshmërinë e Selisë së Shenjtë për të ndihmuar në përpjekjet paqebërëse dhe interesin e tij për të vizituar të dy vendet.
Ai ka dërguar herë të ndryshme përfaqësues në Ukrainë në emër të tij dhe ka dërguar ndihma dhe furnizime.
