Presidenti rus, Vladimir Putin ka njoftuar planet për të vendosur më shumë ushtarë në Arktik, duke përforcuar praninë ushtarake të Moskës në rajon.
Duke folur sot në Forumin Ndërkombëtar të Arktikut në Murmansk, Putin i kërkoi qeverisë ruse të përshpejtojë ndërtimin dhe rinovimin e qyteteve të garnizonit në zonën polare.
“Kjo, natyrisht, lidhet me forcimin e komponentit tonë ushtarak në rajon. Numri i ushtarëve këtu do të rritet”, tha ai, duke theksuar nevojën e Rusisë për të kërkuar të drejtat e saj mes atyre që ai i përshkroi si kërcënime të NATO-s.
Putin akuzoi NATO-n se e shikon gjithnjë e më shumë Veriun e Largët si një fushë beteje të mundshme.
“Sigurisht, ne jemi të shqetësuar vetëm për faktin se vendet e NATO-s po e identifikojnë gjithnjë e më shumë Veriun e Largët si një urë për konflikte të mundshme dhe po provojnë përdorimin e ushtrisë në këto kushte”, tha ai.
Ai vuri në dukje se ”trupat e NATO-s nga Finlanda dhe Suedia gjithashtu do të vendosen në rajon, me të cilët nuk kemi pasur probleme deri vonë”.
Finlanda dhe Suedia iu bashkuan aleancës për shkak të shqetësimeve të sigurisë pas pushtimit të plotë të Ukrainës nga Rusia, në shkurt 2022.
