Presidenti i Shqipërisë, Ilir Meta, priti sot në një takim homologun e tij bullgar, Rumen Radev, i cili ndodhet në Shqipëri për një vizitë zyrtare.
Pas ceremonisë së pritjes në Pallatin e Brigadave në Tiranë, Meta dhe Radev mbajtën një konferencë për mediat, ku presidenti i Shqipërisë tha se Bullgaria vijon të jetë një avokate e palëkundur e integrimit evropian të Shqipërisë dhe vendeve të rajonit.
“Gjatë takimit diskutuam edhe për reformat në Shqipëri, ku theksova se është e rëndësishme që të tregojmë përmirësime lidhur me 9 çështjet e Bundestagut, të cilat janë një udhërrëfyes për Shqipërinë për të lehtësuar çeljen e negociatave të anëtarësimit”, tha Meta.
Duke folur për bashkëpunimin në planin ekonomik dhe tregtar mes dy vendeve, Meta nënvizoi se duhet të bashkohen forcat bashkë dhe me vende të tjera të interesuara për të forcuar Korridorin 8.
“Projektet e veçanta do të shumëfishojnë shkëmbimet tregtare, ekonomike dhe njerëzore ndërmjet dy vendeve tona dhe në një hapësirë nga Adriatiku deri në Detin e Zi. Në këtë drejtim bashkëpunimi në fushën e infrastrukturës sidomos të lidhjes hekurudhore midis portit të Durrësit dhe të Varnës, të energjisë dhe të gjitha së bashku do të bënin të mundur të kishim një infrastrukturë të lehtësuar për ambicien që dy vendet tona kanë në planin bilateral, por edhe rajonal”, tha Meta.
Më tej gjatë fjalës së tij, Meta theksoi se duhet të rritet bashkëpunimi në të ardhmen për përballimin e emergjencave civile.
“Theksova rëndësinë e vazhdimit të bashkëpunimit në fushën e e emergjencave. Kontributi i Bullgarisë ka qenë profesional dhe ka shërbyer si eksperiencë e mirë për ekipet tona”, u shpreh Meta.
Ndërsa presidenti i Bullgarisë, Rumen Radev, tha se kjo vizitë zhvillohet në një atmosferë të mbështetjes reciproke dhe prioriteteve të përbashkëta.
“Unë jam këtu të shpreh mbështetjen e fortë të Bullgarisë për rrugën evropiane të Shqipërisë. Vizita ime është në një moment i rëndësishëm në të cilën vendoset se kush do të jetë perspektiva e Ballkanit Perëndimor, për të cilin Bullgaria kontribuoi shumë duke e kthyer Ballkanin Perëndimor në qendër të vëmendjes së BE-së”, tha ai.
“Bullgaria mendon që Shqipëria është gati të fillojë bisedimet për anëtarësimin në BE. Raporti i fundit i Komisionit Europian thekson përparimin e Shqipërisë në sundimin e ligjit, të drejtat e qytetarëve, reformën e administratës civile, lufta me krimin e organizuar dhe korrupsionit”, u shpreh më tej Radev.
Sipas Radev, procesi i bisedimeve është i ndërlikuar dhe i gjatë dhe sipas tij Bullgaria është gati të ofrojë asistencë.
Duke folur për Ligjin “Për mbrojtjen e pakicave kombëtare në Republikën e Shqipërisë”, Radev tha se ky ligj jep mundësi që pakica bullgare të jetë e lirë që të realizojë të drejtat në Shqipëri.
Duke folur për bashkëpunimin ekonomik mes dy vendeve, Radev tha: “Shqyrtuam perspektivat e zhvillimit ekonomik dhe mund të bëjmë më shumë. Ky proces duhet të stimulohet. Diskutuam edhe mundësitë për rivendosjen e linjës ajrore Tiranë-Sofje, e bashkëpunimin detar përmes porteve. Shpreh solidaritet për pasojat e tërmetit shkatërrimtar”.
Presidenti i Bullgarisë u takua edhe me kryeparlamentarin Gramoz Ruçi dhe zyrtarë të tjerë të Shqipërisë.
