Presidenti Donald Trump pritet të firmosë sot një urdhër ekzekutiv që lejon përdorimin e titullit “Departamenti i Luftës” si emërtim dytësor për Departamentin amerikan të Mbrojtjes, institucionin më të madh të qeverisë së SHBA-së.
Ky ndryshim i hap gjithashtu rrugën Sekretarit të Mbrojtjes, Pete Hegseth, që në komunikimet dhe ceremonitë zyrtare të vetëquhet “Sekretari i Luftës”. Hegseth postoi të enjten në platformën X (ish-Twitter) mbishkrimin “DEPARTMENT OF WAR”.
Ndërkohë që një riemërtim i përhershëm i departamentit kërkon miratim nga Kongresi, Shtëpia e Bardhë njoftoi se urdhri ekzekutiv do ta udhëzojë Hegseth-in të nisë procesin për ndryshimin.
Departamenti i Mbrojtjes, që shpesh i referohen si “Pentagoni” për shkak të formës së ndërtesës së tij në Uashington, ka mbajtur emrin “Departamenti i Luftës” deri në vitin 1949.
Historianët shpjegojnë se emri u ndryshua pas Luftës së Dytë Botërore, për të reflektuar përkushtimin e SHBA-së për të parandaluar konfliktet, sidomos në epokën e armëve bërthamore.
Presidenti Trump e përmendi për herë të parë idenë e rikthimit të emrit në qershor, duke sugjeruar se ndryshimi i dikurshëm ishte bërë për arsye “politike”.
Rikthimi i këtij emri më luftarak mund t’i kushtojë qeverisë dhjetëra milionë dollarë, për shkak të nevojës për zëvendësimin e logos dhe mbishkrimeve në ndërtesa e baza ushtarake në të gjithë botën.
Më herët këtë vit, Hegseth anuloi përpjekjen e Presidentit Joe Biden për të riemërtuar nëntë baza ushtarake amerikane që mbanin emrat e liderëve të Konfederatës, një proces që parashikohej të kushtonte 39 milionë dollarë.
