Tërheqja e ShBA-së nga marrëveshjet dhe organizatat ndërkombëtare nuk përbën ndonjë lajm të ri, prandaj, cila është befasia nëse po largohet nga UNESCO-ja për herë të tretë? Një sondazh global i kryer nga CGTN-i zbulon se 84.2 për qind e të anketuarve nuk janë të befasuar nga ky veprim, çka tregon që bashkësia ndërkombëtare po mësohet me “mungesën” e zakonshme të Amerikës. Ky unilateralizëm i llojit “Amerika e Para” e bën kërkimin për multilateralizëm të vërtetë edhe më urgjent e të nevojshëm.
Justifikimi i qeverisë amerikane këtë herë ishte i drejtpërdrejtë: ajo e akuzoi UNESCO-n për përparimin e “kauzave shoqërore e kulturore përçarëse” që bien ndesh me politikën e saj “Amerika e Para”. Sipas sondazhit, 93.5 për qind e të anketuarve e kritikojnë ShBA-në për shndërrimin e institucioneve ndërkombëtare në mjete për përllogaritjet e saj politike. Në shkurt të vitit 2025, presidenti i ShBA-së Donald Trump urdhëroi një shqyrtim të UNESCO-s për shkak të “ndjenjave kundër Izraelit” të supozuara. 90.7 për qind e pjesëmarrësve në sondazh e shohin tërheqjen e fundit si provë të mëtejshme të favorizimit të Amerikës ndaj Izraelit, ndërsa 91.1 për qind argumentojnë që qasja e ShBA-së ndaj organizatave ndërkombëtare nuk i përshtatet një fuqie të madhe dhe as nuk u shërben interesave kolektive të bashkësisë ndërkombëtare.
Drejtoresha e Përgjithshme e UNESCO-s, Audrey Azoulay, e quajti daljen e ShBA-së për të ardhur keq, por tha se organizata ishte e përgatitur: “Falë përpjekjeve të bëra nga Organizata që nga viti 2018, prirja në rënie e kontributit financiar të ShBA-së është kompensuar.”
Sondazhi zbulon që 88.1 për qind e të anketuarve besojnë se praktika e zakonshme e Amerikës për shkeljen e traktateve ka dëmtuar rëndë besueshmërinë dhe ndikimin e saj global. Ndërkohë, 88.7 për qind thonë që tërheqja e ShBA-së nga organizatat ndërkombëtare tregon animin e politikës së saj drejt qeverisjes antiglobale, demultilateralizmit dhe mekanizmave antindërkombëtarë, kurse 66.7 për qind kanë frikë që dalja e Amerikës nga organizatat ndërkombëtare mund t’i nxisë vendet e tjera të ndjekin shembullin e saj, duke i shkaktuar dëme të mëtejshme bashkësisë ndërkombëtare. Nga ana tjetër, 92.8 për qind e të anketuarve i bëjnë thirrje botës të bashkohet në praktikimin e multilateralizmit të vërtetë dhe të nxitin marrëdhënie më të drejta e më të barabarta.
Sondazhi, i kryer në platformat e CGTN-it në anglishte, spanjishte, frëngjishte, arabishte dhe rusishte, mori përgjigje nga 9 097 pjesëmarrës brenda 24 orëve./cgtn
