Ka dështuar të konstituohet për herë të 48-të Kuvendi i Kosovës, në mungesë të votave të mjaftueshme për të proceduar përpara deri në emërimin e kryetarit të ri të këtij institucioni legjislativ, raporton Anadolu.
Kryesuesi i seancës, Avni Dehari, ashtu sikurse nga 1 maji i këtij viti, propozoi krijimin e komisionit ad-hoc për votimin e fshehtë të pozitës së Kryetarit të Kuvendit, por, të gjitha grupet parlamentare, përpos Lëvizjes Vetëvendosje, nuk e mbështetën krijimin e tij, duke mos propozuar anëtarin (deputetin) e tyre për këtë komision.
Nga 100 deputetët e pranishëm në sallë, vetëm 51 vota ishin pro formimit të këtij komisioni për votimin e fshehtë të kryeparlamentarit, ndërsa kundër dhe abstenime nuk pati.
“Për sot ndërpritet seanca, takohemi më 19 korrik 2025 në ora 11:00”, tha kryesuesi i seancës, Avni Dehari.
Më 28 qershor u zhvillua një takim midis krerëve të partive parlamentare, me qëllim të gjetjes së një konsensusi politik për formimin e institucioneve të reja, por pa rezultate konkrete. Gjithashtu edhe presidentja e Kosovës, Vjosa Osmani, ka pritur në takim këtë muaj krerët e partive parlamentare, me qëllim të gjetjes së një zgjidhje për hapjen e rrugës së formimit të institucioneve të reja.
Pas takimeve me presidenten, krerët e Partisë Demokratike të Kosovës (PDK) dhe Lidhjes Demokratike të Kosovës (LDK) thanë se barra për formimin e institucioneve i takon partisë së parë Lëvizjes Vetëvendosje (LVV) dhe kreut të saj Albin Kurti.
Nga opozita vazhdimisht kanë kërkuar që LVV-ja ta ndërrojë kandidaten për kryetare të Kuvendit, por nga deklarimet e tij, Kurti ka thënë se nuk bëhet fjalë për ndryshim të kandidates Albulena Haxhiu, duke fajësuar opozitën për bllokim të konstituimit të Kuvendit.
Nga 61 vota të nevojshme, kandidatja Haxhiu deri më tani ka marrë jo më shumë se 57 vota për kryetare të Kuvendit të Kosovës, të cilat 48 janë nga LVV-ja dhe 9 nga deputetët që vijnë nga komunitetet. Për herë të parë seanca konstituive u mbajt më 15 prill.
Më 26 qershor, Gjykata Kushtetuese e Kosovës nxori vendimin ku konstatoi se seanca konstituive e Legjislaturës së Nëntë të Kuvendit të Kosovës duhet të përfundojë më së voni për 30 ditë, pra deri më 26 korrik më së largu.
