Kosova të enjten ka aplikuar për anëtarësim në Këshillin e Evropës. Aplikimin në selinë e Këshillit të Evropës, në Strasburg, e ka bërë ministrja e Punëve të Jashtme dhe Diasporës e Kosovës, Donika Gërvalla.
Këshilli i Evropës është një organizatë ndërkombëtare për të drejtat e njeriut, demokracinë dhe sundimin e ligjit në Evropë, me seli në Strasburg të Francës. Këshilli mbron lirinë e shprehjes dhe të mediave, barazinë dhe minoritetet në vendet anëtare.
Nëpërmjet një video-adresimi, ministrja Gërvalla, ka konfirmuar se ka dorëzuar aplikimin për anëtarësim në Këshillin e Evropës, duke thënë se shpreson për një përgjigje pozitive.
“Sot hapet një kapitull i ri për Kosovën në Këshillin e Evropës. Sot fillon procedura e shqyrtimit të kërkesës sonë, e cila do të kalojë nëpër instanca të ndryshme të Këshillit të Evropës, të Asamblesë Paralementare dhe Këshillit Ministror. Kosova e meriton të jetë anëtare e Këshillit të Evropës”, ka thënë ajo.
Ndërkohë, edhe Daniel Holtgen, zëdhënës i Këshillit të Evropës, në një përgjigje për Radion Evropa e Lirë, e ka konfirmuar se kanë pranuar aplikimin e Kosovës për anëtarësim.
“Aplikimi është pranuar dhe do të dërgohet te Komiteti Ministror në linjë me statutin e Këshillit të Evropës”, thuhet në përgjigjen e Holtgenit, i cili nuk dha detaje të tjera në lidhje me procedurat e mëtutjeshme të shqyrtimit të aplikimit.
Vuçiç paralajmëron takim më 13 maj me Këshillin e Sigurisë Kombëtare
Pas aplikimit të Kosovës për anëtarësim në Këshillin e Evropës ka reaguar Beogradi. Sipas presidentit serb, Prishtina zyrtare ka shkelur Marrëveshjen e Uashingtonit, dhe se Serbia do të jep përgjigjen e vet.
Me kërkesën për anëtarësim në Këshillin e Evropës eshte prishur Marrëveshja e Uashingtonit dhe Serbia do të reagojë, ka deklaruar presidenti i Serbisë, Aleksandër Vuçiq, pas aplikimit të Kosovës në KE.
Për këtë veprim të Prishtinës zyrtare, Vuçiq ka paralajmëruar se nesër do të diskutohet në Këshillin e Sigurisë Kombëtare, dhe ka pyetur përqafësuesit ndërkombtarë pse po e thërrasin Beogradin në bisedime, kur Kosova nuk respekton marrëveshjet e arritura.
“Ata e shkelën marrëveshjen brutalisht, nuk shqetësohen për asgjë, pas 10 vitesh shkeljes se marrëveshjes së Brukselit, tani kanë shkelur marrëveshjen e Uashingtonit, ndërsa Rezoluta 1244 nuk është respektuar kurrë”, ka thënë Vuçiq.
Sipas presidentit serb, kjo do të këtë një efekt shtesë në marrëdhëniet në rajon, ndërsa ka bërë pyetje “kush e ka bindur Prishtinën që ta paraqesë këtë kerkesë”. Vuçiq ka shtuar se nuk pres ndonjë reagim nga Perëndimi lidhur me iniciativën e Kosovës.
“Mentorët e Prishtinës janë shumë më të fortë, kjo lojë udhëhiqet nga vendet kryesore perëndimore. Ne jemi një vend i vogël dhe i lirë dhe do të përpiqemi ta kundërshtojmë atë në mënyrë paqësore dhe diplomatike”, tha Vuçiq.
Vuçiq tha gjithashtu se nuk e di nëse Kosova ka shumicën për pranimin në KE, mirëpo sipas tij mund të priten dy të tretat e votave nëse votojnë ato vende që e kanë njohur Kosovën. Sipas tij, ky është presion mbi pesë vende të BE-së të cilat nuk e njohin pavarësinë dhe thirrje për Serbinë që të bëjë të njëjtën gjë.
Nga disa reagime të tjera, vlerësohet se Serbia nuk ka mundur të bëjë asgjë për të lobuar kundër aplikimit të Kosovës në KE, sepse shtetet perëndimore kanë përkrahur Kosoven lidhur me këtë iniciativë, dhe se nuk ka shumë hapësirë për Serbinë.
Në të njëjtin kohë, disa analistë në Beograd vlerësojnë se sipas procedurës në Këshillin e Evropës pranohen vetëm shtetet anëtare të Kombeve të Bashkuara, dhe mbetet të shihet si do të ndodh me Kosovën.
Kujtojme se Marrëveshja e Uashingtonit, apo Marrëveshja për normalizimin e marrëdhënieve ekonomike ndërmjet Serbisë dhe Kosovës është nënshkruar më 4 shtator 2020 në Shtëpinë e Bardhë në prani të presidentit të atëhershëm të SHBA-së, Donald Trump.
Afati i kësaj marrëveshjeje ishte paraparë të zgjatë një vit, por Departamenti i Shtetit më herët kishte inkurajuar Kosovën dhe Serbinë që ta vazhdojnë moratoriumin për çështjet e njohjes që ndërlikojnë përparimin në fushat teknike, pikë e cila ishte pjesë e marrëveshjes.
Çfarë është Këshilli i Evropës?
Këshilli i Evropës është themeluar më 1949. Kjo organizatë ka realizuar fushata për mbrojtje të fëmijëve, kundër gjuhës së urrejtjes si dhe për të drejtat e romëve, të cilët përbëjnë komunitetin më të madh në Evropë.
Këshilli i Evropës u ndihmon vendeve anëtare që të luftojnë korrupsionin dhe terrorizmin, si dhe të kryejnë reformat e duhura gjyqësore.
Grupi i saj i ekspertëve për kushtetutë, i njohur si Komisioni i Venecias, ofron këshilla ligjore për shtete të ndryshme në botë.
Duke qenë organizatë ndërkombëtare, Këshilli i Evropës nuk mund të bëjë ligje, mirëpo ka aftësi të nxisë zbatimin e marrëveshjeve ndërkombëtare, të arritura nga vendet anëtare për tema të ndryshme.
Dy trupat kyçe të Këshillit janë: Komiteti i Ministrave dhe Asambleja Parlamentare.
