4.3 miliardë euro qarkullojnë në duart e shqiptarëve.
Janë këto të dhëna të publikuara nga Banka e Shqipërisë e cila deklaron se paraja fizike që gjendet jashtë sistemit bankar ka vijuar të rritet me një ritëm të shpejtë edhe në tremujorin e parë të vitit 2025.
Në krahasim me muajin mars të vitit të kaluar, ku paraja që qarkullonte jashtë bankave ishte gati 3.9 miliardë euro rritja ka vijuar me 397 milionë euro ose thënë ndryshe 10.2% të parasë që qarkullon në duart e qytetarëve shqiptarëve.
Ka një sërë faktorësh që ndikojnë në këtë prani të madhe të parasë fizike në ekonomi. Është kultura e shqiptarëve e trashëguar ndër vite për mbajtjen e kursimeve të tyre jashtë bankave, normat e ulëta të interesit por niveli I lartë I parasë informale të siguruara edhe nga burimet e paligjshme.
Gjithsej në ekonominë shqiptare qarkullojnë 1.81 trilionë lekë, ndërsa paraja cash përbën 23.7%. Pothuajse 3 herë më shumë se norma mesatare në Bashkimin Europian.
Për reduktimin e pagesave në dorë, Ministria e Financave parashikon në strategjinë afatmesme caktimin e një limiti për pagesat cash, si dhe uljen e tavanit që ekziston për bizneset nën vlerën e 150 mijë lekëve.
