Shoqëria e Kursim – Krediti “FED invest” zhvilloi më 31 maj, në Tiranë, Asamblenë e Përgjithshme Vjetore. Asambleja e Përgjithshme është autoriteti më i lartë vendimmarrës dhe demokratik i FED invest, ku anëtarët kanë të drejtën e votës, sipas parimit një anëtar, një votë. Ky takim, i dymbëdhjeti në radhë, shënoi një tjetër gur themeli në historinë 33 vjecare te institucionit tone si kooperativa financiare më e madhe dhe me e konsoliduar ne vend, me mbi 97 mije anetare dhe me 58 dege te shtrira ne mbare vendin.
Kjo Asamble përmbylli takimet e Mbledhjeve të Përgjithshme Vjetore në të gjitha Njësitë Grup/Bazë, ku anëtarësia u njoh me aktivitetin dhe arritjet e vitit 2024, si dhe objektivat e vitit 2025. Delegatë nga e gjithë Shqipëria, përfaqësues të Njësive Bazë/Grup, u mblodhen në këtë forum për të reflektuar mbi rrugëtimin e vitit 2024, për të vleresuar arritjet, për të shkembyer përvojat dhe diskutuar mbi sfidat dhe zgjidhjet, si dhe për të projektuar së bashku objektivat ambicioze të FED invest-it per vitin 2025.
Në qendër të diskutimeve ishin ceshtje si: rritja e inovacionit dhe e zgjerimi i shërbimeve digjitale, marketingu efektiv, përfshirja financiare për të gjithë segmentet dhe fuqizimi i komuniteteve lokale.
“Asambleja jonë është më shumë se një mbledhje, është një manifestim i vlerave tona të përbashkëta, i besimit dhe bashkëpunimit që na ka sjellë deri këtu,” theksoi Kryetarja e Këshillit Drejtues, të SHKK FED Invest. Zana Konini në fjalën e saj hapëse, duke falënderuar anëtarët, ekipin drejtues dhe partnerët për besimin e mbështetjen e pandërprerë.
Konini, tha se “ me vizionin për financë të qëndrueshme, viti 2025 do të fokusohet në përmirësimin e ofertës sonë unike financiare, fuqizimin e kornizës së menaxhimit të riskut, thellimin e personalizimit të shërbimeve për anëtarët në çdo hap të rrugëtimit të tyre financiar dhe zgjerimin e anëtarësisë për të kapur sa më shpejt këtë vit “gurin kilometrik 100 mijë anëtarë”.
Ndërsa Perlat Sulaj, Administrator i SHKK FED invest, u shpreh se, “gjatë vitit që kaloi FED Invest realizoi me sukses një sëre aktivitetesh institucionale për rritjen e kapaciteteve institucionale në funksion të objektivave strategjikë, fushata marketingu dhe promocioni që kanë sjellë forcimin e “brand-it“ të FED invest në treg, si dhe në komunitetin e institucioneve financiare dhe donatorëve të huaj”. “Kemi vazhduar t‘i konsolidojmë marrëdhëniet me partnerët e huaj, si dhe të fillojmë projekte të reja që vijojnë të zbatohen edhe gjatë vitit 2025”, theksoi Sulaj.
Behar Gjoni Drejtor i Biznesit, njëherazi Zëvendës Administrator i FED Invest tha se, “institucioni jonë I mikrofinancës synon të jetë porta kryesore për sipërmarrësit e vegjël dhe të mesëm në zonat rurale dhe urbane, për të marrë shërbime financiare, duke kontribuar kështu në rritjen ekonomike, përmes fuqizimit të fermerëve, të rinjve, grave dhe aktorëve të zinxhirit të vlerës”.
Gjoni vuri në dukje se vitin e fundit, portofoli i kredive të mikrofinancës FED Invest, është rritur më shumë se dyfishi i rritjes ekonomike.
“Në fund të vitit 2024, portofoli i kredive arriti në vlerën 6.65 miliardë lekë, me rritje 8.2 %, ndërkohë që të ardhurat operacionale të aktivitetit u rritën me 8.8%. Rritja e kredidhënies ka ardhur kryesisht nga financimi i aktiviteteve mikro të konsoliduara dhe SME me 16%. Ndërkohë që financimi i aktiviteteve në sektorin e bujqësisë ka dominuar rritjen e portofolit te kredisë”, tha Gjoni.
Sipas tij, janë disbursuar 4 185 kredi te reja në vlerë 3,16 miliardë Lekë, kryesisht në sektorin e bujqësisë, blegtorisë dhe shërbimeve të ndryshme; ndërsa volumet më të mëdha të kredisë, i zuri produkti mikro me 68% te total të disbursuar.
“Në fund të vitit 2024, portofoli i depozitave shënoi 5.5 miliardë lekë (55 milionë Euro) me rritje 3% krahasuar me një vit më pare dhe kreditë me probleme zbritën në nivelin 6.1%”, deklaroi Gjoni, teksa nënvizoi se, FED Invest mbështet financiarisht, një shkallë të gjerë individësh, biznesesh të vogla dhe te mesme, me një fokus të fortë në krijimin e vendeve të punës, ngushtimin e boshllëqeve gjinore në sipërmarrje, dhe ofrimin e zgjidhjeve financiare në një mënyrë të qëndrueshme.
Asambleja vleresoi lart punen e Komitetit te Kontrollit dhe Komiteteve “Anetari ne Qender” dhe “Ekipi i Opinionisteve”. Asambleja gjithashtu ritheksoi rolin kyç të Qendrës ABA si katalizator për ekspertizen, informacionin dhe njohurite agri dhe përfshirje të grupeve vulnerabël ne finance dhe ngritje kapacitetesh, si dhe rikonfirmoi angazhimin për të thelluar bashkëpunimet me partneret ndërkombëtare ne funksion të rritjes së kapaciteteve, diversifikimit të burimeve të financimit dhe aplikimit të praktikave moderne të bujqësisë së qëndrueshme dhe digjitalizimit, në shërbim të anëtarëve.
Në fund të punimeve, u miratuan vendime të rëndësishme sipas detyrimeve ligjore dhe statutore dhe u miratuan objektivat strategjike për të ardhmen e FED invest.
Vendimet e marra në këtë Asamble përcaktojnë qartë një drejtim të guximshëm përpara: zhvillim të qëndrueshëm, risi dhe zgjidhje teknolohjike dhe angazhim të pandalshëm për mirëqenien financiare të çdo anëtari të FED Invest.
/Argumentum.al
