Presidenti Joe Biden tha të hënën “nuk do të ketë më Nord Stream 2”, një gazjellës i rëndësishëm rus që do të lidhte Rusinë me Evropën, nëse Rusia pushton më tej Ukrainën me “tanke ose trupa”.
Presidenti Biden i bëri këto komente gjatë një konference të përbashkët shtypi me kancelarin gjerman Olaf Scholz në Shtëpinë e Bardhë, menjëherë pasi të dy udhëheqësit u takuan për bisedime rreth krizës në kufirin Ukrainë-Rusi.
Gjermania, e cila përdor gazin natyror rus për të mbuluar gjysmën e nevojave të saj, ka shtyrë miratimin e projektit të gazsjellësit “Nord Stream 2” të paktën deri në gjysmën e dytë të vitit 2022, por ka refuzuar të anulojë projektin pothuajse të përfunduar.
Shtëpia e Bardhë ka shprehur alarmin mbi perspektivën e një konflikti ushtarak në Ukrainë. Zoti Biden po përpiqet të forcojë mbështetjen midis aleatëve evropianë për sanksione të forta ndaj Rusisë nëse ajo merr masa për një pushtim të mëtejshëm të Ukrainës.
Përpjekjet ndërkombëtare për të zbutur tensionet në lidhje me Ukrainën u intensifikuan të hënën, me presidentin francez Emmanuel Macron, i cili zhvilloi bisedime me homologun e tij rus në Moskë dhe kancelarin gjerman Olaf Scholz në Uashington për të koordinuar politikat ndaj Rusisë ndërsa po rritet frika e një pushtim rus të Ukrainës.
Grumbullimi i mbi 100,000 trupave ruse pranë Ukrainës ka nxitur shqetësimet mes udhëheqësve perëndimorë për një ofensivë të mundshme. Këshilltari për sigurinë kombëtare i Shtëpisë së Bardhë, Jake Sullivan, paralajmëroi të dielën se Rusia mund të pushtojë Ukrainën “në çdo moment”, duke shkaktuar një konflikt që do të shoqërohej me një “kosto të madhe njerëzore”.
Rusia ka mohuar se ka plane për të sulmuar fqinjin e saj, por kërkon që Shtetet e Bashkuara dhe aleatët e saj të mos pranojnë kurrë që Ukraina dhe vendet e tjera ish-sovjetike të anëtarësohen në NATO, si dhe të tërheqin forcat e NATO-s dhe armët nga Evropa Lindore. Uashingtoni dhe NATO i kanë hedhur poshtë këto kërkesa.
“Nëse Rusia pushton, pra nëse tanket dhe trupat (ruse) do të kalonin përsëri kufirin e Ukrainës, atëherë nuk do të ketë më Nord Stream 2”, tha zoti Biden. “Ne do t’i japim fund këtij projekti.”
Kjo do të dëmtonte Rusinë ekonomikisht, por gjithashtu do të shkaktonte probleme të furnizimit me gaz natyror për Gjermaninë. Ndërtimi i gazsjellësit ka përfunduar, por ai ende nuk ka filluar punën.
“Ne jemi bashkërisht gati dhe e gjithë NATO është gati”, tha zoti Biden, duke iu referuar aleancës së fuqishme perëndimore, pavarësisht se Ukraina nuk është anëtare e saj.
Ndërsa Biden përsëriti me siguri se gazësjellësi rus “Nord Stream 2” do të ndërpritej, kancelari Scholz theksoi nevojën për të mbajtur njëfarë paqartësie në lidhje me sanksionet në mënyrë që Rusia të ketë një shteg për ndërmarrë veprime drejt uljesë së tensioneve.
“Është e nevojshme që Rusia ta kuptojë se mund të ndeshet me shumë më tepër pasoja se sa ajo mund të ketë llogaritur”, tha zoti Scholz.
Duke folur në fillim të takimit të tij me kancelarin Scholz, presidenti i amerikan Joe Biden tha se Shtetet e Bashkuara dhe Gjermania “po punonin me një hap për të penguar agresionin e mëtejshëm rus në Evropë”.
Kancelari Scholz shtoi: “Ne jemi aleatët më të ngushtë dhe po punojmë intensivisht së bashku, dhe kjo është e duhur për të bërë hapat e nevojshëm për luftimin e agresionit rus kundër Ukrainës”.
Zoti Scholz u tha gazetarëve se “nuk mund të heshtim” për çështjen e Rusisë, duke shtuar se vendosja e trupave ruse afër kufirit me Ukrainën është “kërcënim serioz” për sigurinë evropiane.
Kancelari Scholz përsëriti se “do të ketë kosto shumë, shumë të larta” për Rusinë nëse ajo sulmon Ukrainën.
“Gjermania është një nga aleatët më të ngushtë të Amerikës”, tha Presidenti Biden më herët të hënën në takimin me kancelarin gjerman Scholz në Zyrën Ovale. “Ne po punojmë së bashku për të ndalur agresionin rus në Evropë, për të trajtuar sfidat e paraqitura nga Kina dhe për të promovuar stabilitetin në Ballkanin Perëndimor”, tha më tej presidenti amerikan./voa
