Presidentja e Bankës Qendrore Evropiane (BQE), Christine Lagarde, ka njoftuar largimin nga detyra më 7 shkurt 2027, rreth nëntë muaj përpara përfundimit të mandatit të saj, i cili ishte parashikuar të mbyllej në fund të tetorit të vitit të ardhshëm.
Vendimi u bë publik të enjten nga BQE-ja, e cila konfirmoi se Lagarde kishte njoftuar Këshillin Drejtues të institucionit dhe presidentin e Këshillit Evropian, António Costa, për largimin e saj. Procesi për emërimin e pasuesit do të nisë menjëherë, njoftoi Costa.
Largimi i parakohshëm vjen pas muajsh spekulimesh për të ardhmen e saj dhe në një moment të ndërlikuar për ekonominë evropiane, e cila po përballet me rreziqe inflacioniste, rritje të kostove të energjisë dhe shqetësime për financat publike, veçanërisht në Francë.
Sipas Reuters, largimi i Lagarde-s u jep udhëheqësve të Bashkimit Evropian mundësinë të zgjedhin pasuesin e saj përpara zgjedhjeve presidenciale franceze të vitit 2027. Ky zhvillim merr rëndësi edhe në kushtet kur sondazhet në Francë tregojnë mbështetje të konsiderueshme për kandidaten e së djathtës ekstreme, Marine Le Pen.
Megjithëse nuk është dhënë një shpjegim i plotë zyrtar për vendimin, largimi i saj ka nxitur diskutime mbi kohën dhe dimensionin politik të ndryshimit në drejtimin e institucionit monetar të eurozonës.
Lagarde mori drejtimin e BQE-së në nëntor 2019, në prag të pandemisë COVID-19, dhe gjatë mandatit të saj udhëhoqi institucionin përmes krizave të njëpasnjëshme, përfshirë pasojat ekonomike të luftës në Ukrainë, krizën energjetike dhe rritjen e fortë të inflacionit.
Pasardhësi i saj do të marrë drejtimin e një institucioni kyç për stabilitetin e euros, në një periudhë kur vendimet mbi normat e interesit, inflacionin dhe kushtet e financimit do të vazhdojnë të ndikojnë drejtpërdrejt te bizneset, familjet dhe ekonomitë e vendeve anëtare.
© 2026 Argumentum
