Kuvendi i Shqipërisë miraton me 118 vota zgjatjen e mandatit të Vetingut

Votohet në Kuvendin e Shqipërisë me vota 118 pro, 4 abstenim zgjatja e afateve të Vetting-ut. Kreu i grupit parlamentar të PS-së, Taulant Balla tha se deputetët bashkuan sot votat për të votuar pro zgjatjes së afateve të Vetting-ut.

Deputetët e Kuvendit miratuan me 118 vota pro, 0 kundër dhe 4 abstenime projektligjin “Për disa ndryshime në ligjin nr. 8417, datë 21.10.1998 “Kushtetuta e Republikës së Shqipërisë” të ndryshuar”.

Pas këtij votimi, mandati i organeve të Vetingut zgjatet deri në 31 dhjetor 2024.

Votimi i sotëm erdhi pasi i gjithë komuniteti ndërkombëtar ka bërë thirrje që zgjatja e afateve të vettingut të votohet.

SHBA dhe BE përmes një deklarate të përbashkët i bënë thirrje deputetëve që të votojnë të gjithë pro këtyre ndryshimeve. Ata nënvizuan se reforma në drejtësi po jep rezultate dhe edhe falë saj vendi ka bërë shumë përparim.

Ndërkombëtaret mirëpresin vendimin e Kuvendit të Shqipërisë

Ambasada gjermane

Ambasadori Zingraf u shpreh sot rreth vendimit të Kuvendit: „Parlamenti shqiptar ka shprehur sot në mënyrë të qartë vullnetin e tij për të ecur përpara drejt anëtarësimit në BE. Përgëzoj të gjithë deputetët, që votuan për vijimin dhe përmbylljen e procesit të verifikimit të të gjithë gjykatësve dhe prokurorëve, e kësisoj për reformën në drejtësi dhe shtetin ligjor. Përshëndes faktin që pjesë të opozitës parlamentare mundësuan këtë vendim me shumicë të cilësuar, duke e mbështetur atë në mënyrë konstruktive. Kjo është një votë për të ardhmen e Shqipërisë në Bashkimin Evropian.“, shprehet ai.

Prezenca e OSBE-së në Shqipëri

“Prezenca e OSBE-së në Shqipëri mirëpret vendimin ndërpartiak të Kuvendit për të zgjatur mandatin e institucioneve të vetingut. Kjo votë njeh faktin që Kushtetuta u përket të gjithë qytetarëve shqiptarë, dhe ne përgëzojmë konvergjencën mes opozitës dhe maxhorancës. Përfundimi i reformës në drejtësi është i një rëndësie kyçe. Është po aq e rëndësishme që të gjitha forcat politike të vijojnë në rrugën e reformës me këtë frymë respekti të ndërsjellë për të mirën e interesit kombëtar. Prezenca e OSBE-së do të vijojë t’u ofrojë mbështetje të plotë institucioneve shqiptare, në bazë të mandatit të saj dhe të bashkëpunimit tonë afatgjatë.

Po ashtu, përshëndesim ngritjen e komisioneve të posaçme për reformën zgjedhore dhe atë territoriale. Prezenca mbetet e gatshme të vijojë të ndihmojë institucionet e Shqipërisë për zbatimin e rekomandimeve të OSBE/ODIHR-it”

Ambasada e Britanisë së Madhe

Mirëpresim vendimin e Kuvendit të Shqipërisë për të mbështetur në zgjatjen e mandatit të institucioneve të vetingut.

Votimi i sotëm është një angazhim i fortë drejt zbatimit të pricesit të reformës në drejtësi dhe një gjyqësori efikas dhe të pavarur.

Delegacioni i BE-së në Tiranë

“Sot Kuvendi i Shqipërisë tregoi vendosmëri të fortë ndërpartiake për të ecur përpara drejt anëtarësimit në BE !

Urime deputetëve të forcave politike që votuan sot për zgjatjen e vettingut, një moment historik vendimtar drejt përfundimit të reformës në drejtësi.

Kjo ishte një votë për të ardhmen e Shqipërisë në BE. E rëndësishme që organet e vettingut të vazhdojnë punën e tyre, me profesionalizmin dhe integritetin më të lartë, për të siguruar një finalizim të suksesshëm dhe të shpejtë të procesit.

Përshëndes gjithashtu vendimet e rëndësishme të Kuvendit për propozimet e Partisë Demokratike për të çuar përpara në komisionet ad hoc punën për reformën zgjedhore në përputhje me rekomandimet e OSCE/ODIHR, si dhe për reformën territoriale, duke ruajtur arritjet e deritanishme,” Ambasadori i BE-së Luigi Soreca.

Ambasada e SHBA-së në Shqipëri

Shtetet e Bashkuara përshëndesin miratimin e zgjatjes së mandatit të vetingut në Parlament. Ky është një hap i rëndësishëm përpara për të gjithë shqiptarët – drejt një sistemi drejtësie më të fortë, më të besueshëm dhe drejt integrimit europian. Shtetet e Bashkuara do ta mbështesin gjithmonë Shqipërinë përgjatë kësaj rrugë të rëndësishme.

Ambasada italiane

Urime autoriteteve shqiptare për zgjatjen e “vetingut” në unanimitet të plotë. Reforma në drejtësi vazhdon!

/Argumentum.al