Presidenti francez Emmanuel Macron u bëri thirrje të sot konservatorëve, socialdemokratëve dhe të gjelbërve që të bashkëpunojnë me centristët e tij për të formuar një qeveri të ardhshme, disa javë përpara zgjedhjeve të parakohshme parlamentare.
Macron tha se ishte i përgatitur të bashkëpunonte me të gjithë ata që nuk ishin në aleancën ekstreme në të majtë apo të djathtë.
“Ky është një rithemelim i jetës politike, për të cilin bëj thirrje me përulësi dhe vendosmëri të madhe”, tha ai.
Macron tha se ishte i bindur se socialdemokratët, radikalët, ambientalistët, kristiandemokratët dhe shumë bashkatdhetarë dhe politikanë francezë në kuptimin më të gjerë, të cilët nuk ishin të mbërthyer në ekstremizëm dhe që mbështesnin disa qasje të qarta, mund të punonin së bashku për të krijuar një projekt të ri qeverisës.
Ai lëshoi një paralajmërim kundër rreziqeve nga e majta ekstreme dhe e djathta ekstreme. Këto grupe nuk ishin të bashkuara për asnjë nga çështjet e së ardhmes dhe nuk do të ishin në gjendje të formonin një shumicë qeverisëse”, tha ai.
“Unë besoj fuqishëm se vetëm forcat politike që formojnë shumicën presidenciale sot kanë aftësinë për të paraqitur një projekt qeveritar koherent, realist dhe të orientuar drejt së ardhmes”, tha Macron.
Duke reaguar ndaj humbjes së grupeve liberale dhe paraqitjes së fortë të nacionalistëve të krahut të djathtë në zgjedhjet evropiane të dielën, Macron njoftoi zgjedhjet e parakohshme të Asamblesë Kombëtare që do të organizohen në dy faza, më 30 qershor dhe 7 korrik.
