Prof.Dr. Enver Bytyçi
Një gjyqtar, një prind e bashkëshort, një qytetar i Republikës nuk jeton më. Astrit Kalaja ishte viktima e fundit e sistemit politik dhe atij gjyqësor në Shqipëri. Çdokush që ka pak ndjesi dhe përgjegjësi njerëzore e dënon aktin makabër të vrasjes së gjyqtarit Kalaja. Jeta e tij u mor nga dora e njeriut, ndërkohë që për jetën tonë vendos dhe duhet të vendosë vetëm Zoti. Por në Shqipëri ka ndryshuar sërishmi sistemi i të drejtës. Nuk është më Zoti ai që vendos për jetën tonë. Për të vendos një njeri i vetëm, kryeministri i Shqipërisë. Derisa ai ia ka dhënë vetes të drejtën që “me ligj” tua marrë pronën qytetarëve të këtij vendi, është po ai që vendos për fatin njerëzor!
Pavarësisht kësaj, ngjarja e së hënës në Gjykatën e Apelit në Tiranë duhet të bëjë që shoqëria jonë të ndalet, të marrë frymë thellë dhe të reflektojë. Të reflektojë për të ndërtuar një sjellje qytetare të së drejtës me institucionet e shtetit. Dhe të reflektojë për raportin e zhdrejtë që është krijuar midis qytetarit dhe shtetit, sistemit politik, si dhe sistemit gjyqësor. Shoqatat e gjyqtarëve dhe institucionet e tjera të pushtetit gjyqësor kanë adresuar kritika ndaj policisë dhe kanë kërkuar reflektim për kushtet e punës së gjyqtarëve. Ky reagim është kaq formal dhe i thjeshtëzuar, sa një gjë të tillë do ta bënte edhe „akademia“ e çobanëve e Frida Krifcës. Edhe opozita po i mëshon fort përgjegjësisë së policisë dhe masave të sigurisë për gjyqtarët. Të gjitha këto qëndrojnë. Por nuk janë shkaku kryesor i ngjarjes tragjike të eleminimit të gjyqtarit Astrit Kalaja. Atentatori mund ta vriste atë jashtë sallës së gjyqit dhe ndoshta të fshihej. Por nuk zgjodhi këtë. Ai zgjodhi sallën e gjyqit, sepse aty i dukej se po asgjëson vetë padrejtësinë e shtetit dhe sistemit qeverisës që kemi ndërtuar! Çka do të thotë se gjyqtari Kalaja u „ndodh në vendin e gabuar“!
Prandaj është koha për reflektim. Është koha për kthesë dhe përmbysjen e rendit të sotëm spekullativ në Shqipëri. Nuk e di çfarë duhet të ndodhë më shumë që komuniteti i gjyqtarëve, prokurorëve, avokatëve, përmbaruesve dhe të tjerë, të revoltohen dhe të imponojnë përmbysjen e këtij sistemi ligjor, burokratik dhe autoritar që është vendosur në Shqipëri. Thelbi, palca e qenies njerëzore është familja dhe prona. Pa këta dy elementë nuk ka e nuk mund të ketë as koncept se çfarë përfaqëson shteti dhe kombi. Nëse shteti sillet me familjet shqiptare dhe me pronën e tyre si xhahil politik dhe dhunues permanent, atëherë ky shtet nuk është më i qytetarëve dhe i nuk përfaqëson interesat e tyre e as të kombit që drejton.
Përgjegjësia për atë që ndodhi të hënën e shkuar në Gjykatën e Apelit me vrasjen e gjyqtarit Kalaja është e shtetit. Eshtë e përgjegjësi e sistemit të gabuar që ndërtuam pas rëniës së sistemit totalitar komunist. Dikush e quan si sistem të Katovicës të Ramiz Alisë. Nuk jam nga ata që bësoj në konspirativitet. Por besoj plotësisht se platforma e ish-komunistëve qe marrja prej tyre në dorë e ekonomisë, me qëllim që përmes posedimit të parasë të shtinin në dorë plotësisht pushtetin politik dhe ta përdornin këtë pushtet për sundim dhe jo për shërbim. Dhe në fakt e arritën këtë objektiv. Sot Shqipëria është vendi elsperimental tipik i kësaj strategjie. Kjo falë edhe kontributeve të Soros dhe veglave të veta.
Shumë njerëz, qytetarë të vendit tonë e kërkojnë këtë përgjegjësi edhe te opozita e sotme. Po! E pohoj me plot gojën se opozita e sotme dhe Sali Berisha kanë përgjegjësi për implementimin e kësaj skeme të kapjes së shtetit në Shqipëri. Opozita e sotme ka një përgjegjësi të madhe për faktin se ishte presidenti i zgjedhur prej saj, Bamir Topi, së bashku me ndihmësin e tij, Kreshnik Spahiu, ata të cilët futën si kulturë korrupsionin në emrimin e gjyqtarëve dhe prokurorëve. Dhe nuk reaguan asnjëherë për këtë. Nuk tentuan që të grumbullojnë fakte e prova dhe t’I çonin para përgjegjësisë penale të korruptuarit në gjyqësor, së bashku me dy protagonistët kryesorë që përmenda më lart. Opozita ka përgjegjësi, sepse shpesh herë iu nënshtrua diktatit të opozitës së majtë për të mos vepruar me vendosmëri në zgjidhjen e çeshtjes së pronave dhe mos ndërtimin e një sistemi politik dhe shtetëror efikas e të përgjegjshëm për këtë vend.
Por autorët e kësaj katastrofe në sistemin politik e të qeverisjes në Shqipëri janë qeveritë e majta të këtij vendi, sidomos kjo e 12 – 13 viteve të fundit. Në qeverisjen e Edi Ramës shqiptarët u shndërruan në “dele” dhe në kavie për eksperiment sipas skemës së Soros! Ne u bëmë delet e Edi Ramës. Ai pati dhe ka ende mundësinë që të na shpronësojë për llogari të djajve oligarkë apo edhe të huaj. Ai ndërtoi ligje shpronësimesh pa të drejtë ankimimi. Edhe akti normative për ndërtimet pa leje parashikon prishjen e objektit, pavarësisht se I dëmtuari ankohet ose jo në gjykatë. Kësisoj shteti vepron si xhandar i kohës së mesjetës kundër qytetarëve të vet. Eshtë qeveriai ajo që nuk e njeh vlefshmërinë e vendimeve të drejtësisë. Qeveria merr në dorë monopolin e kësaj drejtësie, ndërkohë që në çdo vend të botës demokratike shteti është vetëm palë para drejtësisë. Megjithatë, nëse dikush ankohet dhe gjyqtari i jep atij të drejtë, kryeministri ynë do t’i lëshohet gjyqtarit sikur ky gjyqtar të ishte kriminel. Gjithnjë në emër të “së drejtës së shtetit”, duke injoruar plotësisht të drejtën e qytetarit. “E drejta“ e qeverisë mbi pronën e qytetarit sot është e pakufizuar. Ndërsa e drejta e qytetarit për pronën e tij është thuajse inekzistente. Shteti nxjerr dhëmbët kundër qytetarëve gjithnjë dhe sa herë që qytetarët reagojnë dhe kundrshtojnë dhunimin e pronës prej tyre. Kështu ka ndodhur në jug të Shqipërisë, kështu ndodh tani në Theth dhe në Valbonë. Kjo ndodhi te Astiri, të lagjja 5 maji, në Kombinat dhe në sa e sa qytetete e fshatra të Shqipërisë. Aq shumë e ka ngushtuar rrethin e kësaj të drejte shteti, sa i kërkon qytetarit që edhe kur të ndërrojë pllakat e banjos të marrë lejen e tij.
Shteti i sotëm është shndërruar në regjim. Nuk ka më asnjë dallim me autokracinë edhe në administrimin e pronës. Shteti i sotëm dhe sistemi i tij ligjor e djallëzor punon në të gjitha format, me të gjitha mjetet dhe në çdo rast në favor të grupimit të sipërmarrësve dhe dhunon qytetarin në të drejtën e tij për pronën. Edhe Kina, e cila njihet si vend me qeverisje njëpartiake, i respekton më shumë se shteti shqiptar të drejtat e qytetarëve të saj për pronën. Qeveria e Edi Ramës jo vetëm nuk i mbron këto të drejta, por ndjehet e përmalluar dhe krenare të shohë veten në terren me fadroma dhe eskavatorë që prishin dhe shkatërrojnë pronën e qytetarëve.
E gjitha kjo shoqërohet pastaj me ndërtimin e skemës makabre për t’i dhënë mundësi sistemit gjyqësor t’i zvarrisë pa fund proceset kur ka konflikt për pronën. Kjo skemë djallëzore e lodhjes dhe e testimit të durimit të qytetarëve për të drejtën e pronës funksionon për mrekulli deri në kufijtë deri në kufijtë e dëshprimit të thellë të qytetarëve. Qëllimi është që këta njerëz të dëshpruar e të rrënuar psikologjikisht të lëshojnë vendlindjen dhe të marrin rrugën e emigrimit jashtë Shqipërisë. Në këtë mënyrë sistemi i fëlliqur i ndërtuar sidomos në dekadën e fundit ka larguar mbi një milion shqiptarë nga Shqipëria. Jo vetëm kaq, por prodhoi krim dhe mafie brenda e jashtë vendit. Mjafton të kujtomë se në pesë vitet e fundit në Angli numri i të burgosurve shqiptarë nga 500 është rritur në mbi 3000 gjithsej. Këtë kriminalitet e prodhoi politika kanabizuese kriminale e kryeministrit të Shqipërisë. Qoftë dhe vetëm për këtë arsye ai duhej të ishte përballë Astrit Kalasë të hënën e shkuar! Por jo! Rrënuesit e sistemit dhe të drejtësisë shijojnë çartet dhe luksin, ndërsa viktimat e tyre burgun dhe padrejtësinë. Tani duket se migrimi nuk mjafton për t’i ikur epshit të qeverisë shqiptare për të rrëmbyer pronat në emër të Olsjanëve.
Nëse ne shqiptarët nuk mësojmë nga ngjarja e dhimbshme dhe e trishtueshme e së hënës, atëherë këtë vend do ta sundojnë të huajt, të cilët do të vijnë me bekimin e Edi Ramës dhe do na nxjerrin ne edhe nga shtëpitë tona që i kemi me tapi! Nëse nuk reagojmë sot, nesër do të jetë shumë vonë dhe do të ketë jo pak njerëz që do të reagojnë dhunshëm kundërkëtij sistemi të korruptuar!
© 2025 Argumentum
