Kuvendi i Kosovës ka miratuar me 90 vota pro rezolutën për Dhomat e Specializuara në Hagë, në një moment kyç për procesin gjyqësor ndaj ish-krerëve të UÇK-së. Përmes saj kërkohet respektimi i standardeve ndërkombëtare për një gjykim të drejtë dhe mbrojtja e të drejtave të të akuzuarve.
Kuvendi i Kosovës ka miratuar rezolutën për Dhomat e Specializuara dhe Zyrën e Prokurorit të Specializuar në Hagë, me 90 vota pro, 1 kundër dhe asnjë abstenim.
Lista Serbe ka lëshuar sallën para se të hidhej në votim Rezoluta për Hagën, për t’u rikthyer menjëherë pas përfundimit të votimit. Ndërsa LDK nuk mori pjesë në votim, pasi kërkesa e tyre për futjen si pikë në kuadër të kësaj rezolute, për hetimin e vrasjeve të pasluftës, nuk u përfshi në tekstin e rezolutës.
Kuvendi i Kosovës po trajton rezolutën për procesin gjyqësor në Hagë
Kuvendi i Kosovës është duke bërë shqyrtimin e propozim rezolutës për Dhomat e Specializuara dhe Zyrën e Prokurorit të Specializuar në Hagë.
Me kërkesë të AAK-së është bërë ndryshimi i rendit të ditës, duke e bërë këtë rezolutë pikë të parë të diskutimit. Ndërkaq, Përparim Gruda nga partia që ka kërkuar trajtimin e rezolutës, PDK tha se i takon Kuvendit të Kosovës të ketë një qëndrim lidhur me procesin gjyqësor.
Kjo rezolutë vjen në kohën kur Prokuroria e Specializuar në Hagë ka kërkuar nga 45 vite dënim me burg për secilin nga katër krerët e Ushtrisë Çlirimtare të Kosovës të cilët po gjykohen atje.
Rezoluta është si më poshtë:
- KËRKON nga Dhomat e Specializuara dhe Zyra e Prokurorit të Specializuar që, në ushtrimin e funksioneve të tyre, të sigurojnë zbatimin me përpikëri të standardeve kushtetuese dhe ndërkombëtare lidhur me një proces gjyqësor të drejtë dhe të paanshëm, duke respektuar gjithashtu parimet e transparencës, llogaridhënies dhe kultivimit të besimit të publikut në drejtësi.
- KËRKON nga Dhomat e Specializuara dhe Zyra e Prokurorit të Specializuar që, në ushtrimin e funksioneve të tyre, të sigurojnë zbatimin me përpikëri të standardeve kushtetuese dhe ndërkombëtare lidhur me mbrojtjen e të drejtave dhe lirive themelore të të akuzuarve, përfshirë edhe detyrimet që burojnë nga jurisprudenca e Gjykatës Evropiane për të Drejtat e Njeriut.
- KËRKON nga Ombudspersoni i Dhomave të Specializuara, përgjegjësia ekskluzive e të cilit për Dhomat e Specializuara dhe Zyrën e Prokurorit të Specializuar buron nga Kushtetuta e Republikës së Kosovës, që të veprojë me pavarësi dhe paanësi të plotë në ushtrimin e këtij funksioni, në përputhje me detyrimet kushtetuese dhe aktet e standardeve ndërkombëtare lidhur me këtë funksion.
- INKURAJON të gjitha shtetet demokratike, përfshirë ato financuese dhe mbështetëse të Dhomave të Specializuara dhe Zyrës së Prokurorit të Specializuar, të bashkohen në thirrjen tonë për respektimin e plotë të standardeve ndërkombëtare për një gjykim të drejtë dhe të paanshëm – standarde këto që burojnë nga tradita kushtetuese e të gjitha shteteve demokratike dhe akteve e rekomandimeve të miratuara nga mekanizmat ndërkombëtarë, përfshirë, por pa u kufizuar, nga Kombet e Bashkuara, Bashkimi Evropian, Këshilli i Evropës dhe Organizata për Siguri dhe Bashkëpunim në Evropë.
- INKURAJON mekanizmat monitorues për respektimin e të drejtave dhe lirive themelore në kuadër të organizatave ndërkombëtare, si dhe organizatat joqeveritare ndërkombëtare e vendore, për monitorim të shtuar të pajtueshmërisë së funksionimit të Dhomave të Specializuara dhe Zyrës së Prokurorit të Specializuar me standardet ndërkombëtare për mbrojtjen e të drejtave dhe lirive themelore në procese gjyqësore dhe raportimin e shkeljeve të evidentuara.
- KONFIRMON zotimin dhe përkushtimin për sigurimin e të gjitha mekanizmave, përfshirë ato financiare, në mbështetje të të drejtave të mbrojtjes së udhëheqësve dhe luftëtarëve të Ushtrisë Çlirimtare të Kosovës para Zyrës së Prokurorit të Specializuar dhe Dhomave të Specializuara.
- KONFIRMON zotimin dhe përkushtimin e plotë për ndërmarrjen e të gjitha veprimeve për afirmimin e vlerave të luftës së Ushtrisë Çlirimtare të Kosovës dhe shenjtërisë së historisë mbi të cilën është ndërtuar Republika e Kosovës.
/RTK-Argumenutm.al
