Rendi i vjetër ndërkombëtar, i ndërtuar mbi ekuilibrat e pas Luftës së Ftohtë dhe dominimin e strukturave tradicionale të sigurisë, po i lë vendin një epoke të re të pasigurisë dhe rivalitetit global. Në këtë kontekst, në Konferencen e Mynihut për Sigurinë, kancelari gjerman Friedrich Merz artikuloi një mesazh të qartë: Evropa duhet të përshtatet me realitetin e ri shumëpolar dhe të forcohet nga brenda. Sipas tij, koha e iluzioneve ka përfunduar, tani kërkohet unitet, partneritet dhe vendosmëri për të garantuar sigurinë, lirinë dhe prosperitetin në dekadat që vijnë.
Në një nga forumet më të rëndësishme globale për sigurinë, Konferenca e Mynihut për Sigurinë (MSC), kancelari i Gjermanisë, Friedrich Merz, deklaroi se “rendi i vjetër botëror nuk ekziston më”, duke paralajmëruar se Evropa po përballet me një realitet të ri gjeopolitik që kërkon vendime të guximshme dhe bashkëpunim të thelluar.
Ai theksoi se periudha e stabilitetit relativ pas Luftës së Ftohtë ka marrë fund dhe se arkitektura tradicionale e sigurisë ndërkombëtare po sfidohet nga rivalitete të fuqive të mëdha, konflikte rajonale, kërcënime hibride dhe presione ekonomike globale. Sipas tij, Evropa duhet të përballet me këtë transformim jo me frikë, por me vendosmëri dhe vizion strategjik.
Në thelb të fjalimit të tij ishte një mesazh i qartë politik: Gjermania dhe Evropa nuk do të ndjekin rrugën e politikës tradicionale të fuqive të mëdha.
“Udhëheqje në partneritet, po. Fantazi hegjemoniste, jo,” deklaroi Merz, duke theksuar se dominimi unilateral nuk është një opsion për Berlinin apo për kontinentin evropian.
Ai kujtoi gjithashtu mësimin historik të Gjermanisë nga periudha e errët e nazizmit, duke nënvizuar se vendi i tij nuk do të veprojë kurrë më i vetëm në arenën ndërkombëtare. “Ne e pohojmë lirinë tonë me fqinjët tanë, vetëm me fqinjët tanë, aleatët dhe partnerët tanë,” tha ai.
Në këtë kontekst, Merz konfirmoi angazhimin e fortë të Gjermanisë ndaj Bashkimi Evropian dhe NATO, duke i cilësuar ato si shtyllat kryesore të sigurisë dhe stabilitetit evropian.
Siguria dhe konkurrueshmëria – dy shtylla të së ardhmes evropiane
Një nga elementët më të rëndësishëm të fjalimit ishte lidhja e drejtpërdrejtë mes ekonomisë dhe sigurisë.
“Politika e konkurrueshmërisë është politikë sigurie. Dhe politika e sigurisë është politikë konkurrueshmërie. Të dyja i shërbejnë lirisë sonë,” u shpreh kancelari.
Sipas tij, në një botë ku zinxhirët e furnizimit mund të përdoren si instrument presioni dhe ku teknologjia është kthyer në mjet strategjik, Evropa duhet të forcojë bazën e saj industriale dhe teknologjike.
Merz theksoi nevojën për:
- Reduktimin e varësive të njëanshme nga lëndët e para dhe teknologjitë kyçe.
- Ndërtimin e zinxhirëve të qëndrueshëm dhe të diversifikuar të furnizimit.
- Investime më të mëdha në inovacion dhe industri strategjike.
Sipas tij, vetëm një Evropë ekonomikisht e fortë mund të mbrojë në mënyrë efektive vlerat dhe interesat e saj.
Forcimi i mbrojtjes dhe i rendit demokratik
Në planin e sigurisë, Merz paralajmëroi se kërcënimet nuk janë vetëm ushtarake, por edhe hibride dhe të brendshme.
Ai përsëriti zotimin për ta bërë ushtrinë gjermane forcën më të fuqishme konvencionale në Evropë sa më shpejt të jetë e mundur, duke theksuar se mbrojtja kolektive kërkon kapacitete reale dhe të besueshme.
Gjithashtu, kancelari përmendi legjislacionin e ri për të forcuar rezistencën e rrjeteve energjetike dhe infrastrukturës kritike ndaj sulmeve hibride, si dhe nevojën për të rritur kapacitetet e shërbimeve të inteligjencës përballë kërcënimeve të brendshme dhe të jashtme.
Një tjetër prioritet i përmendur ishte siguria në Arktik, rajon që po fiton rëndësi të madhe gjeostrategjike për shkak të ndryshimeve klimatike dhe rivaliteteve ndërkombëtare.
© 2026 Argumentum
