Qindra mijëra qytetarë u mblodhën të dielën në Pragë për të mbrojtur pavarësinë e televizionit dhe radios publike, duke kundërshtuar planin e qeverisë për ndryshimin e sistemit të financimit të tyre.
Protesta u organizua nga organizata qytetare Million Moments for Democracy në sheshin Letná, një nga hapësirat më të mëdha publike të kryeqytetit çek. Sipas raportimeve të mediave, në tubim morën pjesë rreth 350 mijë deri në 400 mijë persona, të ardhur nga pjesë të ndryshme të vendit.
Slogani i protestës, “Kurrë më 4:36”, i referohej orës kur shumica qeverisëse miratoi në parim, në lexim të parë, një amendament të kontestuar të ligjit për mediat publike, në mes të tetorit. Votimi u zhvillua në orët e para të mëngjesit të së shtunës, pasi shumica ndërpreu debatin parlamentar, duke mos u dhënë mundësinë më shumë se 60 deputetëve të opozitës të merrnin fjalën.
Në qendër të kundërshtimeve është plani i qeverisë së kryeministrit Andrej Babiš për të hequr tarifat mujore që familjet paguajnë për televizionin dhe radion publike dhe për t’i financuar ato drejtpërdrejt nga buxheti i shtetit.
Aktualisht, familjet që zotërojnë televizor paguajnë 150 koruna çeke në muaj për televizionin publik, ndërsa tarifa për radion është 55 koruna. Sipas të dhënave të publikuara, të ardhurat vjetore të Televizionit Çek nga këto tarifa arrijnë në 6.73 miliardë koruna, ndërsa Radio Çeke përfiton 2.47 miliardë koruna.
Kundërshtarët e reformës paralajmërojnë se kalimi në financimin buxhetor mund të rrisë ndikimin politik mbi dy institucionet dhe të rrezikojë pavarësinë editoriale dhe paanshmërinë e tyre. Shqetësime janë shprehur gjithashtu për faktin se subvencioni i ardhshëm shtetëror mund të jetë më i ulët se të ardhurat që sigurohen aktualisht nga tarifat.
Protestuesit kërkuan gjithashtu që partia e koalicionit qeverisës, Liria dhe Demokracia e Drejtpërdrejtë (SPD), e drejtuar nga Tomio Okamura, të tërhiqet nga qeveria.
Në mbështetje të mediave publike u rreshtuan organizata studentore, dhjetëra teatro, shkrimtarë, sportistë të njohur, përfaqësues të komuniteteve fetare, punonjës të shëndetësisë dhe organizata ndërkombëtare të gazetarëve.
Gjatë fjalimeve në protestë u theksua se mediat publike nuk mund të jenë pronë e politikanëve, qeverisë apo shtetit, por duhet t’i shërbejnë të gjithë shoqërisë dhe të pasqyrojnë pluralizmin e saj.
Nga ana tjetër, Radek Vondráček, përfaqësues i partisë më të madhe në koalicionin qeverisës ANO, kritikoi organizatorët e protestës, duke e cilësuar organizatën Million Moments for Democracy si një “shoqatë agitatorësh profesionistë”.
Protesta u transmetua drejtpërdrejt nga televizioni publik informativ CT24 dhe u ndoq nga agjencia shtetërore e lajmeve CTK dhe disa media të pavarura. Sipas policisë, tubimi u zhvillua pa incidente deri në orët e mbrëmjes.
© 2026 Argumentum
