Kryeministri Edi Rama në një deklaratë për mediat në 3-vjetorin e themelimit të SPAK, tha se ka kërkuar prej këtij organi që të hetojë politikanët e rangut të lartë, duke theksuar se kjo nuk është presion.
Ai ka thënë se duhet hetuar 21 janari, ku 4 protestues u vranë me plumba të vërtetë, por edhe Gërdeci, ku humbën jetë me dhjetëra e u plagosën me qindra. Kryeministri theksoi gjithashtu se në ‘lupën’ e SPAK të jenë edhe disa afera korruptive.
“Ta bësh këtë thuajse një vit pasi shpallja non grata është bërë dhe pasi sekretari amerikan i shtetit. ka kërkuar publikisht se institucionet duhet të bëjnë punën e tyre. Që të jemi shumë të qartë, unë skam kërkuar dhe askush s’ka kërkuar dënim, por hetim. Dënimin s’e vendosim ne, por që të hetohet një çështje që është guri në qafë për të gjithë Shqipërinë, është domosdoshmëri. Që të zbardhet deri në fund e vërteta nga një drejtësi e drejt dhe e pavarur duhet të çlirohet nga komplekset e së kaluarës dhe më në fund të hetohen 21 janari, krimi shtetëror nuk para shkruhet. Të hetohet deri në fund nëse është apo jo.
Gjatë një konference të përbashkët me Ministrin e Drejtësisë Ulsi Manja, Rama tha se këto hetime i kërkon jo për arsye personale apo politike, por për drejtësinë ku thotë se qeveria e tij ka bërë investimin më të madh.
“Nuk e kërkoj hetimin nga SPAK për çështje personale dhe karrierës politike, por lidhte me investimin më të madh politik dhe moral që është bërë në këtë vend që është reforma në drejtësi, dhe drejtësia”, tha Rama.
Kryeministri Edi Rama deklaroi sot se “PS është i vetmi subjekt politik në këtë vend, që as nuk i ka bërë, as nuk i bën dhe as nuk do t’i bëjë njëherë ndonjë presion drejtësisë”.
Në një konferencë për mediet nga selia e PS-së, së bashku me ministrin e Drejtësisë, Ulsi Manja, Rama tha se “jemi këtu sot në vijim të një diskutimi që është ngjallur nga qëndrimi im në Asamblenë Kombëtare të PS-së lidhur me nevojën që SPAK të hetojë në mënyrë gjithëpërfshirëse korrupsionin e politikanëve e gjykatësve e të prokurorëve të korruptuar që si të tillë janë përjashtuar nga procesi i vetingut”.
“Disa e kanë quajtur këtë presion mbi drejtësinë, disa të tjerë frikë nga humbja e pushtetit, ndërsa të tjerë e kanë komentuar si përpjekje për të fshehur dështimet e qeverisë. Për mua më e rëndësishme është që ky diskutim të bëhet sepse SPAK së shpejti mbush 3 vjet dhe vetingu në pak javë mbush 5 vjet”, tha Rama.
“Për pak vite pritja e popullit shqiptar për një drejtësi të drejtë dhe të barabartë mbush 35 vjet, prandaj si dikush që për shkak të detyrës e ka udhëhequr politikisht, moralisht dhe vendosmërisht Reformën në Drejtësi, në emër të forcës politike që i ka dhënë kësaj reforme të gjithë fuqinë e mbështetjes së vetë morale, politike, profesionale, nga pikënisja dhe deri më sot, por edhe si njeriu që është sulmuar më shumë për këtë reformë, jo vetëm nga kundërshtarët e saj të betuar por edhe mbështetësit e saj, unë besoj se të drejtën që të ndaj qëndrimin tim për punët e drejtësisë së re nuk ma heq dot askush”, tha Rama.
Kryeministri Rama i përgjgijet Ambasadores Yuri Kim
Çfarë presioni është të kërkosh hetimin e një ish-presidenti dhe ish-kryeministri të shpallur “non grata” nga SHBA me akuzat më të rënda të mundshme?!’- tha Rama.
Duke iu referuar ambasadores amerikane Yuri Kim, e cila tha pak ditë më parë se politikanët nuk duhet që t’i ushtrojnë presion drejtësisë, duke kërkuar hetimin e dikujt, Rama duket se iu pergjigj nga kjo konference;
“Jam dakord me këtë, thjesht adresa është gabim. Nuk them që drejtësia po gabon. Them se sic po vjen në anën tonë, të jetë dhe me të tjerët, nuk duam të jetë e pjesshme. Nuk kam asnjë dallim. Jam shumë dakord, po flas për ndërhyrjen për presion. Këtë nuk ma thotë dot njeri as anglisht, as shqip dhe në asnjë gjuhë. Le ta shkruajnë e ta përsërisin, nuk më intereson fare”, tha Rama.
Në vazhdim të kësaj linje Rama hoqi paralele midis saj çfarë thotë për SPAK dhe deklaratave te BE e SHBA.‘Çfarë do të duhej të thoshim pastaj për deklaratat e përfaqësuesve të BE apo SHBA, ku është kërkuar edhe hapur nominalisht ndëshkimi i politikanëve apo gjykatësve të korruptuar? Presion mbi drejtësinë?’- u shpreh kreu i qeverisë.
Duke iu drejtuar sërish SPAK, dhe vendosur veten në njeriun që ka udhëhequr reformën më të madhe nga koha e mbretërisë, Rama e krahasoi me Këshillin e Lartë të Shtetit.
‘Të hetohen 21 janari. U vranë 4 njerëz me plumba të vërtetë. Të hetohet Gërdeci, janë dhjetëra të vrarë dhe qindra të plagosur. Ndërtonim teatrin e kukullave, por pronën na e ka marrë një gjykatëse, çfarë kërkon Arben Kraja nga unë, kur këtë gjykatëse e ka këtu e ka në listë për 462 mijë euro të pajustifikuara. ’- tha Rama.
Kryeministri Edi Rama ka paralajmëruar se do të ketë kallëzime penale në SPAK për figura të Partisë Socialiste dhe kryebashkiakë të kësaj force politike.
“Shumë shpejt do të jeni kallëzime edhe për figura të Partisë Socialiste nga njësia antikorrupsion dhe do ta shikoni. Do të ketë kallëzime atje në SPAK për kryetarë bashkie të PS-së që e kanë turpëruar këtë parti dhe që duhet t’i kishte kapur më përpara drejtësia. Por, ne bëjmë punën tone, njësia anti korrupsion bën punën e vetë, nuk bën punën e SPAK-ut”, tha Rama.
Ministri i Drejtësisë, Ulsi Manja: Të hetohen prokurorët e gjyqtarët miliarderë të shkarkuar nga vettingu
Ndërsa Ministri i Drejtësisë, Ulsi Manja ka kërkuar hetimin e gjyqtarëve dhe prokurorëve të cilët janë shkarkuar nga vetingu apo kanë dhënë dorëheqjen për shkak të këtij procesi.
Gjatë një komunikimi me kryeministrin Edi Rama nga selia e PS-së, Manja tha se kjo është një përgjegjësi e organeve të ndjekjes penale.
“Organet e tjera të ndjekjes penale dhe të hetimit, kanë përgjegjësinë kushtetuese dhe ligjore për të hetuar deri në fund, të gjyqtarëve dhe prokurorëve që dolën nga sistemi”, deklaroi ministri.
Sipas Manjës 530 gjyqtarë dhe prokurorë kanë kaluar në filtrin e vetingut dhe prej tyre, 197 janë shkarkuar.
Manja u shpreh se këta gjyqtarë dhe prokurorë janë shkarkuar për deklarim të rremë, fshehje të pasurisë si dhe për dhe mungesë të burimeve financiare për pasuritë e krijuara.
“Nga 530 gjyqtarë dhe prokurorë që kanë kaluar filtrin e vetingut, 197 prej tyre janë shkarkuar për deklarim të rreme, deklarim të pjesshëm, fshehje pasurie dhe mungesë të burimeve financiare për pasuritë e krijuara. 51 të tjerë kanë dhënë dorëheqjen për shkak të procesit të vetingut. 27 prej tyre kanë dhënë dorëheqjen pasi kanë marrë rezultatet e vlerësimit nga KPK”, tha ministri.
Manja deklaroi se 800 gjyqtarë dhe prokurorë, përfshirë ndihmësit ligjorë e këshilltarët ligjorë janë subjekt i rivlerësimit sot.
‘Po ju jap disa shifra, kjo është e dhimbshme, rezulton se nga 197 prokurorë e gjyqtarë të larguar dhe 50 të dorëhequr nga frika e vetingut, po u rendis top listën e 10 gjyqtarëve dhe prokurorëve që kryesojnë listën dhe mua askush s’më thotë dot pa e hetuar drejtësia e re, se nga e kanë vënë këtë pasuri që nuk e justifikojnë dot .
Subjekti i parë me 857 mln lekë të vjetra të pajustifikuara, ose 714 euro, që në jetën e vet ka bërë vetëm punën e prokurorit, ta hetojë drejtësia e re sepse për këtë e ngritëm. 800 mln lekë të vjetra subjekti i dytë, ky jo vetëm mungesë burimesh por ka ngel dhe te pastërtia e figurës, lidhje me botën e krimit të organizuara.
691 mln lekë të vjetra tjetri. 600 mln lekë të pa justifikuara, por ky rezulton i lidhur me subjektin e pestë, se janë bashkëshortë, 550 mln lekë të vjetra ka bashkëshortja. 460 mln lekë tjetri dhe e mbyll i 10 në listë me 129 mijë euro. Doni me apartamente? 13 apartamente, shpi, dyqane, vilë, është larguar nga vetingu. Tjetri 3 vila, janë vendime këto nuk po i them unë.
10 pasuri tjetri, ndërsa një subjekt tjetër jo vetëm që ka deklarim të rremë dhe mungesë burimesh por ka ndërtuar dhe vilë pa leje në tokën e dikujt tjetër, dhe më lejoni miq, se ne kemi një kuadër ligjor të ashpër për ndërtimet pa leje, drejtësia jonë e re ka dënuar dhe për një avlli pa leje, ky ka kryer dhe vepër penal. Po kjo pse nuk fillon kryesisht? Të qepen mbrapa me shku një kallzim me të kap 22 prokuroritë e vendit për ndërtim pa leje dhe në fshatin më të thellë, me rrënje e degë ta zbardhin çështjen për katër ditë. Drejtësia jonë e re ka dënuar për një avlli, ndërsa një prokuror që ka ndërtuar pa leje, pse nuk fillon një hetim.’- tha Manja.
/Argumentum.al
