Presidenti i Ukrainës thotë se është i gatshëm për negociata “të vërteta”.
Para se t’u drejtohet udhëheqësve botërorë në Samitin global për Klimën, këtë të martë, Presidenti i Ukrainës Volodymyr Zelenskyy tha se vendi i tij është i gatshëm të shqyrtojë negociata “të vërteta” me Rusinë.
Zoti Zelensky tha se vendi i tij është i hapur për bisedime me Moskën nëse Ukrainës i kthehen kufijtë, nëse kompensohen viktimat e pushtimit dhe sulmit rus dhe bëhen përpjekje që autorët të vihen para përgjegjësisë.
Deklaratat e Presidentit vijnë pas një artikulli të gazetës “Washington Post” në të cilin shkruhej se Shtetet e Bashkuara duan që Ukraina të tregojë gatishmëri për bisedime për paqe. Kjo gatishmëri, sipas artikullit, do të forconte mbështetjen ndërkombëtare për Kievin.
Kreu i Këshillit Kombëtar për Mbrojtje dhe Siguri të Ukrainës, Oleksiy Danilov, tha se kushti kryesor për të shqyrtyar këtë mundësi ishte rikthimi i integritetit territorial të Ukrainës.
Zoti Danilov shtoi se është e nevojshme të merren garanci për mbrojtje ajrore moderne, avionë, tanke dhe raketa me rrezë të gjatë, duke forcuar thirrjen për vazhdimin e mbështetjes ndërkombëtare.
Municione, armë bërthamore
Koreja e Veriut dënoi deklaratat e Shteteve të Bashkuara të martën se ajo po mbështet Rusinë me armë dhe municione për t’i mundësuar vazhdimin e luftës në Ukrainë.
Shërbimet inteligjente amerikane konfirmuan së fundmi se Rusia i ishte drejtuar Koresë së Veriut për raketa dhe predha artilerie.
Vendi i izoluar ka kryer dhjetëra prova, duke përfshirë raketa balistike që mund të pajisen me mbushje bërthamore me aftësinë për të goditur Shtetet e Bashkuara. Koreja e Veriut ka kërcënuar SHBA-në me raketat dhe artilerinë e saj, duke pretenduar se mund të godasë “pa mëshirë” objektivat në Korenë e Jugut dhe Shtetet e Bashkuara.
Një gazetë ruse pohoi të martën se Rusia dhe Shtetet e Bashkuara vazhdojnë bisedimet mbi armët strategjike bërthamore.
Gazeta “Kommersant” citoi katër burime që kishin dijeni mbi çështjen duke shtuar se bisedimet mund të zhvillohen në Lindjen e Mesme.
Bisedimet mbi traktatin e ri të Pakësimit të Armëve Strategjike që vendos kufizime në arsenalet bërthamore kanë ngecur që pas sulmit të Rusisë kundër Ukrainës më 24 shkurt.
Mbrojtja e Ukrainës
Ukraina mori dërgesën e parë të sistemit amerikan NASAMS, një sistem tokë-ajër mbrojtjeje ajrore me rreze të shkurtër dhe të mesme, si edhe sistemin italian të mbrojtjes ajore Aspide.
“Ne do të vazhdojmë të rrëzojmë objektivat e armikut që po na sulmon. Faleminderit partnerëve tanë: Norvegjisë, Spanjës dhe Shteteve të Bashkuara,” shkroi në Twitter ministri ukrainas i Mbrojtjes Oleksii Reznikov.
Ndërkohë, Ministria e Mbrojtjes së Britanisë së Madhe tha të martën se Rusia ka nisur ndërtimin e strukturave mbrojtëse në qytetin e Mariupolit. “
“Dy fabrika po prodhojnë struktura piramidale antitank prej betoni, sipas zyrtarëve britanikë.
“Rusia po forcon linjat e saj në të gjithë zonat e pushtuara. Më 19 tetor 2022, pronari i grupit paraushtarak “Wagner Group”, Yevgeny Prigozhin, tha se grupi po krijon një linjë të fortifikuar mbrojtjeje në rajonin e Luhanskut, të pushtuar nga Rusia. Ky aktivitet lë të kuptohet se Rusia po bën një përpjekje të konsiderueshme për të përgatitur mbrojtjen më në thellësi se vijat aktuale të frontit, me gjasë që të parandalojë çdo përparim të shpejtë të Ukrainës”, thuhej në deklaratë.
Zëdhënësi i Këshillit të Sigurisë Kombëtare të Shtëpisë së Bardhë, John Kirby tha muajin e kaluar se Shtetet e Bashkuara po përshpejtonin dërgimin e sistemit të avancuar norvegjez të raketave tokë-ajër, në Ukrainë pas sulmeve të Rusisë mbi infrastrukturën energjetike të Ukrainës./voa
