Kryeministri Edi Rama kërkoi një qasje më politike ndaj zgjerimit të Bashkimit Evropian, duke mbështetur përfshirjen graduale të vendeve kandidate në strukturat e BE-së, pa cenuar parimin e anëtarësimit të bazuar në meritë.
Gjatë pjesëmarrjes në Forumin e II-të të Zgjerimit të Bashkimit Evropian, që po zhvillohet në Bruksel nën temën “Evropë më e gjerë – Evropë më e fortë”, Rama argumentoi se vendet kandidate duhet të përfshihen në tryezën evropiane, ndërsa vijojnë të përmbushin kriteret dhe detyrimet për anëtarësim të plotë.
Në panelin “Arritjet e zgjerimit: Reforma, Investime dhe Rritje”, ku morën pjesë edhe kryeministrat e Malit të Zi dhe Maqedonisë së Veriut, Milojko Spajić dhe Hristijan Mickoski, si dhe komisioneri evropian Valdis Dombrovskis, Rama theksoi se integrimi gradual është një mundësi që nuk kërkon ndryshimin e mekanizmit të zgjerimit.
“Procesi i bazuar në meritë është kryesisht dhe mbi të gjitha një dhuratë për ne”, deklaroi Rama, duke nënvizuar se ky proces i ndihmon vendet kandidate të ndërtojnë institucione më të forta dhe të përmirësojnë funksionimin e shtetit.
Megjithatë, ai kritikoi atë që e cilësoi si mungesë të vullnetit politik në Bashkimin Evropian, duke argumentuar se, ndërsa Komisioni Evropian vijon të kërkojë reforma nga vendet kandidate, politika e brendshme e shteteve anëtare shpesh bëhet pengesë për avancimin e zgjerimit.
Rama solli si shembull mundësinë që vendet kandidate të përfshihen në tryezën e përbashkët evropiane, ndërkohë që procesi i negociatave dhe përmbushja e kritereve të vijojnë. Sipas tij, kjo do të shmangte mbajtjen e vendeve të Ballkanit Perëndimor jashtë strukturave evropiane për një periudhë të gjatë.
“Ka ardhur koha për Komisionin Evropian, për Këshillin, për shtetet anëtare t’i sjellë të shtatë dhe t’i ulë përreth tryezës”, u shpreh ai, duke iu referuar vendeve kandidate.

Protestat në Shqipëri dhe perspektiva evropiane
I pyetur nga moderatorja Suzanne Lynch, drejtuese e zyrës së Bloomberg në Bruksel, nëse protestat e muajve të fundit në Shqipëri kanë ndikuar në imazhin e vendit dhe në dëshirën e tij për t’u anëtarësuar në BE, Rama i cilësoi zhvillimet si shprehje të pritshmërive më të larta të shoqërisë shqiptare.
Duke iu referuar protestave dhe vëmendjes ndërkombëtare që ato kanë marrë, ai përdori konceptin e “revolucionit të pritshmërive më të larta”, duke argumentuar se qytetarët kërkojnë më shumë nga transformimi ekonomik dhe institucional i vendit.
Sipas Ramës, kjo kërkesë për më shumë vëmendje dhe rezultate është legjitime dhe lidhet drejtpërdrejt me procesin e integrimit evropian.

Mesazhi për Serbinë dhe Kosovën
Në nisje të fjalës së tij, Rama ngriti gjithashtu shqetësimin për interpretimin e një kënge me përmbajtje nacionaliste në prag të forumit, të cilën e cilësoi si të papajtueshme me frymën e unitetit evropian.
Ai theksoi se nuk duhet të lejohen mesazhe që rikthejnë konfliktet historike dhe tensionet nacionaliste në rajon.
“Sa më shpejt që Serbia të normalizojë dhe të njohë Republikën e Kosovës, aq më mirë do të jetë për Serbinë dhe për të gjithë të tjerët”, deklaroi Rama, duke ritheksuar rëndësinë e bashkëpunimit rajonal dhe të perspektivës së përbashkët evropiane.
Në përfundim, kryeministri nënvizoi se Shqipëria mbetet e vendosur në rrugën drejt Bashkimit Evropian, duke e cilësuar anëtarësimin si një objektiv strategjik dhe pa alternativa të tjera.
“Ne duam të martohemi këtu, me Bashkimin Evropian, me çdo kusht”, u shpreh Rama me tone ironike, duke shtuar se vendet e Ballkanit Perëndimor duhet të jenë pjesë e së ardhmes evropiane.
© 2026 Argumentum





















































