Ministri i Jashtëm i Türkiye-s, Mevlüt Çavuşoğlu, pas një takimi trepalësh me homologët e tij nga Suedia dhe Finlanda, tha se Suedia duhet të ndërmarrë më shumë hapa kundër terrorizmit, raporton Anadolu Agency (AA).
Takimi trepalësh u zhvillua në margjinat e takimit të ministrave të Jashtëm të vendeve anëtare të NATO-s që mbahet në Bukuresht, ku marrin pjesë edhe kryediplomatët e Suedisë dhe Finlandës, vende që kanë shprehur synimin e tyre për anëtarësim në Aleancë.
“Në takimin e djeshëm, ne mirëpritëm hapat e ndërmarrë drejt anëtarësimit dhe vendosmërinë e qeverisë së re suedeze, e cila është më e vendosur se ajo e mëparshmja”, tha Çavuşoğlu në një konferencë për media pas takimit të ministrave të Jashtëm të NATO-s në kryeqytetin e Rumanisë.
Pasi Suedia dhe Finlanda njoftuan synimet e tyre për anëtarësim në NATO në maj, zyrtarët turq shprehën shqetësime mbi tolerancën dhe madje mbështetjen e grupeve terroriste nga këto vende. Në një takim trepalësh në qershor, të tre vendet nënshkruan një memorandum sipas të cilit vendet nordike zotohen të trajtojnë shqetësimet e Türkiye-s.
Duke thënë se Türkiye ende nuk ka parë ndonjë hap konkret nga Suedia për ekstradimin e kriminelëve, ngrirjen e aseteve të terroristëve dhe përfundimin e aktiviteteve terroriste në vend, Çavuşoğlu citoi legjislacionin në këtë drejtim, por theksoi se dëshirojnë të shohin “zbatimin e ligjeve”.
“Përpos synimit për anëtarësim në NATO, ne jemi të vetëdijshëm se qeveria e re është më e sinqertë në luftën kundër terrorizmit”, shtoi ai, duke iu referuar qeverisë suedeze që mori pushtetin në tetor.
Lidhur me luftën në Ukrainë, Çavuşoğlu tha se vendi i tij vazhdon ndihmën humanitare për Ukrainën dhe popullin ukrainas, duke u zotuar të vazhdojë përpjekjet për masat e ndërtimit të besimit.
“Qëllimi ynë më i madh është të mbajmë kanalet diplomatike të hapura. Ne po shpjegojmë dhe tregojmë domosdoshmërinë e mbajtjes së diplomacisë edhe kur lufta vazhdon”, tha ai.
I pyetur në lidhje me pritjet e Türkiye-s nga aleatët e NATO-s në përpjekjet e saj kundër terrorizmit, Çavuşoğlu tha: “Mbështetja e disa aleatëve, veçanërisht e SHBA-së, për grupet terroriste në Siri është e qartë. Kështu, ne përsërisim nevojën për t’i dhënë fund kësaj lloj mbështetjeje”.
Türkiye ka protestuar prej kohësh për mbështetjen e ofruar nga SHBA-ja për grupin terrorist YPG/PKK në veri të Sirisë, përgjatë kufijve të Türkiye-s, ndërsa SHBA-ja thotë se është aleate me grupin për të luftuar DEASH-in. Autoritetet turke thonë se nuk ka kuptim të përdoret një grup terrorist për të luftuar një grup tjetër terrorist.
Në fushatën e saj terroriste më shumë se 35-vjeçare kundër Türkiye-s, PKK, e listuar si një organizatë terroriste nga Türkiye, SHBA dhe BE, ka qenë përgjegjëse për vdekjen e më shumë se 40 mijë njerëzve, përfshirë gra, fëmijë dhe foshnja. YPG është dega terroriste e PKK-së në Siri.
