Presidenti rus Vladimir Putin e quajti “çmenduri” politikën e BE-së për çmimet e gazit dhe hodhi poshtë të gjitha pretendimet kundër Rusisë për këtë çështje.
Në një takim të Këshillit të vendit për Zhvillimin Strategjik dhe Projektet Kombëtare, Putin akuzoi vendet perëndimore për shpallje të “luftës ekonomike” ndaj Rusisë.
“Perëndimi kolektiv na ka sulmuar me një luftë ekonomike”, tha Putin, duke theksuar se vendet perëndimore gabojnë në llogaritjen e tyre se ekonomia ruse do të shembet si rezultat i kësaj lufte.
Ai tha gjithashtu se Rusia po përballet me agresion “të paprecedentë” në formën e sanksioneve që synojnë të shtypin me shpejtësi ekonominë e vendit duke provokuar një kolaps të monedhës ruse, rublës, “përmes vjedhjes së rezervave valutore” dhe duke shkaktuar “inflacion shkatërrues”.
Putin shtoi se Moska synon të riorientojë furnizimet e saj me energji në tregje të reja me rritje të shpejtë, si Azia, Lindja e Mesme, Amerika Latine dhe Afrika.
“BE-ja vazhdon të konsumojë mallrat dhe shërbimet tona, ndërkohë që frenon furnizimet. Situata e pabarazive të tilla nuk mund të vazhdojë pafundësisht. Çfarë duhet të bëjmë? Ne do të kërkojmë partnerë të tjerë, më premtues në rajonet me rritje aktive të ekonomisë botërore. Këto janë Azia, Lindja e Mesme, Amerika Latine dhe Afrika”, tha Putin.
Ai gjithashtu specifikoi Lindjen si një pikë fokusi për riorientimin e gazit rus, i cili sipas tij do të rritet në 88 miliardë metra kub deri në vitin 2030.
“Një hap i rëndësishëm për të reduktuar ndikimin e sanksioneve dhe veprimeve të tjera armiqësore kundër Rusisë do të jetë zhvillimi i infrastrukturës së porteve dhe tubacioneve në jug dhe lindje, duke përfshirë rritjen e eksportit të gazit natyror. Zbatimi i projekteve të tilla … do të mundësojë rritjen e furnizimeve të gazit në lindje në 48 miliardë metra kub deri në vitin 2025 dhe në 88 miliardë deri në vitin 2030”, tha ai.
