Ministri i Jashtëm kinez, Qin Gang, i bëri thirrje G20-s që të ketë bashkëpunim më të ngushtë në rritjen e multilateralizmit dhe promovimin e zhvillimit global, gjatë Takimit të Ministrave të Jashtëm të G20-s, shkruan “Xinhua”.
Kryediplomati kinez u kërkoi anëtarëve të Grupit që të angazhohen për multilateralizëm, si dhe ndërtimin e konsensusit dhe globalizimit.
Qin tha se përballë një situate të paqëndrueshme ndërkombëtare dhe sfidave globale në rritje, G20-a duhet të rrisë bashkëpunimin dhe të kontribuojë me pjesën e saj në zhvillimin dhe prosperitetin global.
“Anëtarët e G20-s duhet të praktikojnë multilateralizëm të vërtetë, të mbështesin sistemin ndërkombëtar dhe rendin ndërkombëtar të bazuar në të drejtën ndërkombëtare dhe të respektojnë normat themelore të marrëdhënieve ndërkombëtare të mbështetura nga qëllimet dhe parimet e Kartës së OKB-së”,- tha ai, duke theksuar parimet e dialogut në baza të barabarta dhe ndërtimin e konsensusit përmes konsultimit në trajtimin e çështjeve globale.
Sipas tij, anëtarët e G20-s duhet të promovojnë zhvillimin e globalizimit dhe të sigurojnë funksionimin e qetë të zinxhirëve globalë industrialë dhe të furnizimit.
Ai bëri thirrje për përpjekje për ta bërë zhvillimin global më gjithëpërfshirës, elastik dhe më të dobishëm për të gjithë, duke shtuar se Iniciativa e Zhvillimit Global të propozuar nga Kina ka ofruar një opsion të ri për rritjen e zbatimit të Agjendës së OKB-së 2030 për Zhvillim të Qëndrueshëm.
Për të rritur bashkëpunimin ndërkombëtar për zhvillimin, sipas tij, anëtarët e G20-s duhet të mbështesin Samitin e Objektivave të Zhvillimit të Qëndrueshëm të Kombeve të Bashkuara, të trajtojnë sfidën e klimës dhe të veprojnë sipas Kornizës Globale të Biodiversitetit Kunming-Montreal.
Ai vuri në dukje se Kina do të vazhdojë të marrë pjesë aktive në të gjitha axhendat e G20-s dhe të japë kontribut më të madh në promovimin e paqes dhe zhvillimit botëror dhe ndërtimin e një komuniteti me një të ardhme të përbashkët për njerëzimin.
Ministrat e jashtëm të G20 patën diskutime të thella mbi multilateralizmin, sigurinë e ushqimit dhe energjisë, bashkëpunimin për zhvillimin dhe kundër terrorizmit, ndër tema të tjera. Palët pjesëmarrëse shprehën shqetësimin e përbashkët për situatën aktuale ndërkombëtare dhe besuan se qeverisja globale duhet të përmirësohet dhe se forcimi i multilateralizmit është më i rëndësishëm se kurrë. Ata ranë dakord gjithashtu që G20-a duhet të luajë një rol kyç dhe të veçantë dhe të gjitha palët duhet të demonstrojnë vullnet politik, të kërkojnë konsensusin më të madh, të ndërmarrin veprime praktike për promovimin e bashkëpunimit gjithëpërfshirës dhe rritjen e qëndrueshmërisë ekonomike, si dhe të bashkojnë duart për të adresuar sfidat globale.
