Presidenti Erdoğan në konferencën e përbashkët për media me presidenten Osmani, lidhur me anëtarësimin e Kosovës në NATO ka deklaruar se, “Ne do të ndërmarrim hapa për të njohur Kosovën dhe ne e njohim Kosovën si anëtare të NATO-s”
Presidenti i Turqisë, Recep Tayyip Erdoğan, në konferencën e përbashkët për media në Ankara me presidenten e Kosovës, Vjosa Osmani, lidhur me anëtarësimin e Kosovës në NATO ka deklaruar se, “Ne do të ndërmarrim hapa për të njohur Kosovën dhe ne e njohim Kosovën si anëtare të NATO-s”, raporton Anadolu Agency (AA).
“Ne gjithmonë e kemi mbrojtur dhe e mbrojmë edhe sot se zgjerimi i NATO-s do të jetë i dobishëm. Derisa ne po ndërmarrim këto hapa, ne e duam këtë për paqen botërore”, deklaroi Erdoğan.
Duket se konflikti Rusi-Ukrainë po i kapërcen të gjitha klauzolat e BE-së dhe NATO-s sa i përket zgjerimit dhe anëtarësimit.
Kujtojmë se më 28 shkurt, Presidenti Zelensky nënshkroi një kërkesë për anëtarësimin e Ukrainës në Bashkimin Evropian. Ndërsa në Ballkan Kosova e cila ndjehet si më e kercenuara nga Serbia, ka kërkuar nëpërmjet Ministrit të Mbrojtjes së Kosovës anëtaresimin e Kosovës në NATO.
Më heret ish-deputetja e Parlamentit Evropian Doris Pack ka kërkuar njohjen e Kosovës nga pesë vendet të cilat ende nuk e kanë bërë këtë. Sipas Pack, njohja e Kosovës nga Spanja, Greqia, Sllovakia, Rumania dhe Qipro duhet të bëhet menjëherë.
“Kjo luftë kundër Ukrainës është një thirrje zgjimi për një politikë më të përkushtuar dhe më efektive të zgjerimit të BE-së me vendet e Ballkanit Perëndimor. Diktatori Putin po përdor ndikimin e tij në disa prej këtyre vendeve për të dobësuar BE-në,” tha Pack në një postim në rrjetet sociale të martën.
