Në këtë ditë të veçantë për Kosovën dhe mbarë popullin tonë – në ditëlindjen e shtetit të Kosovës, Këshilli i Ambasadorëve Shqiptarë shpreh urimet më të përzemërta e më të ngrohta dhe uron për progres të pandalshëm e për begatinë e të gjithë qytetarëve të saj.
Në këtë Përvjetor të 14-të të Pavarësisë, ngjarjes së dytë më të madhe në historinë e shqiptarëve, kemi legjitimitetin dhe krenarinë, por edhe mirënjohjen e thellë kombëtare, për të kujtuar e nderuar të gjithë ata që për dekada kanë punuar e sakrifikuar për këtë arritje të madhe. Detyra e të gjithëve është t’i përgjigjemi me përulësi dhe angazhim të vazhdueshëm sakrificave të panumurta.
Republika e Kosovës, e njohur nga 115 shtete të botës, anëtare e shumë organizmave ndërkombëtare, reflekton angazhimin e përgjegjshëm të saj drejt vlerave perëndimore. Ajo është tashmë një kontribuese aktive e sigurisë në rajon e më gjerë.
Në dekadën e dytë si shtet i pavarur e sovran, Kosova po dëshmon për një qasje demokratike, e cila sa vjen dhe konsolidohet. Sfidat me të cilat ajo përballet tani kërkojnë që të mbizotërojë uniteti rreth objektivit strategjik për integrimin evropian dhe euro-atlantik, si dhe njohjen e mëtejshme në arenën ndërkombëtare.
Përfaqësimi i njëzëshëm i Kosovës dhe koordinimi me partnerët strategjikë, do të mundësojë edhe finalizimin e suksesshëm të dialogut të ndërmjetësuar me Serbinë – njohjen reciproke ndërmjet dy vendeve.
Këshilli i Ambasadorëve Shqiptarë shpreh bindjen e thellë se populli dhe institucionet e Kosovës, me vendosmëri, përkushtim dhe qartësi strategjike, do të vazhdojnë rrugëtimin e përbashkët në mbrojtjen dhe fuqizimin e mëtejshëm të shtetit të tyre dhe të vlerave të së ardhmes euroatlantike të Kosovës.
Tiranë, 17 Shkurt 2022,
/Argumentum.al
