Editorial
Rusia dhe Ukraina. Dy popuj vëllezër janë gati të shkojnë drejt një përplasje vëllavrasëse.
Tashmë prej muajsh kryefjala e mediave perëndimore është konflikti Rusi-Ukrainë. Një konflikt që deri tani betejat e para i ka zhvilluar virtualisht.
Kremlini ka grumbulluar më shumë se 100,000 trupa rreth Ukrainës dhe po zhvillon stërvitje ushtarake në Bjellorusi.
Uashingtoni ka paralajmëruar se lufta mund të shpërthejë në çdo moment. Vendet perëndimore po tërheqin diplomatët e tyre nga Kievi dhe kanë urdhëzuar shtetasit amerikanë të largohen menjëherë nga Ukraina.
Pavarësisht thirrjeve për qetësi nga z. Zelensky dhe një sërë udhëheqësish të tjerë, Kievi ka përgatitur një plan për të evakuar tre milionë banorët e kryeqytetit.
Kujtojmë se pas revoltës së vitit 2014, Kremlini aneksoi gadishullin e Krimesë, një territor i Ukrainës dhe mbështeti një kryengritje në pjesën industriale rusisht-folëse të ish-republikës sovjetike, që shtrihet në lindje të vendit.
Që nga ajo kohë marrëdhëniet mes Moskës dhe Kievit janë tensionuar shumë.
Presidenti rus Vladimir Putin kërkon që NATO të garantojë se nuk do të zgjerohet duke bërë edhe Ukrainën pjesë të saj si dhe që aleanca të largojë trupat ushtarake nga vendet e Evropës Lindore. Por si Uashingtoni ashtu edhe NATO i ka hedhur poshtë këto kërkesa të Kremlinit.
SHBA-NATO-Britania e Madhe dhe BE, (megjithëse kjo e fundit është ende në një pozicion neutral), kanë kërcënuar me sanksione të fuqishme dhe e kanë paralajmëruar Rusinë se një pushtim i mundshëm ndaj Ukrainës do të ketë pasoja të rënda.
Me të njëjtën gjuhë flet dhe Moska zyrtare, ku Putin në konferencë me Macron bëri të qartë se Rusia po tërhiqej në një luftë ku nuk do të kishte fitues.
Ndërsa prej muajsh SHBA-NATO-Rusia janë në bisedime të vazhdueshme qoftë në takime bilaterale apo dhe në biseda të gjata virtuale në nivel presidencial Putin-Biden dhe ministror Lavrov-Blinken.
Çuditërisht nga të gjitha këto bisedime diplomatike, duke shtuar edhe përpjekjen e Presidentit francez Emmanuel Macron, nuk po e qetësojnë situatën, përkundrazi, pas çdo bisede duket se trupat ruse afrohen më afër Ukrainës sikundër trupat e NATO-s i afrohen më afër kufijve rus.
Ndërsa në të gjitha bisedimet diplomatike për Ukrainën, mungon vetë pala ukrainase. Asaj vetëm i raportohet herë nga Biden, herë nga Blinken, e herë nga Macron për bisedimet që bëhen për Ukrainën, në emër të Ukrainës por pa vetë Ukrainën(!)
Këtë fakt e vuri në pah vetë Presidenti ukrainas z. Zelesnky i cili tha se dëshiron që për Ukrainën të mos negociohet pa praninë e saj. Duke shtuar se kërkojnë që ky konflikt të zgjidhet në mënyrë diplomatike. Madje ai prere kërkoi nga Perendimi që të mos krijojnë panik.
Sot disa muaj pas gjithë kësaj furie diplomatiko-ushtarake jemi në pikën më të nxehtë të këtij konflikti.
SHBA bashkë me aleatet e saj kanë tërhequr një pjesë të mirë të trupit diplomatik nga Kievi, duke e lënë atë pa shpresë. Populli ukrainas është në panik dhe i paqartë. Pentagoni tashmë ka përcaktuar edhe kohën se kur mund të ndodhë sulmi rus ndaj Ukrainës, ndërsa vete Rusia e përjashton këtë mundësi. Madje edhe në bisedën telefonike të fundit të 12 shkurtit ndërmjet Blinken dhe Lavrov, kryediplomati rus akuzoi vetë SHBA-në për ‘propagandë’ anti-ruse.
E vetmja që po mundohet të ruaje qetësinë deri diku është vetë Ukraina e cila ndihet që po kthehet në një “sanduiç” në mes Rusisë dhe SHBA-së.
Zelenskiy tashmë sytë i ka nga populli i tij i cili iu bën thirrje në çdo moment që të mos krijojnë panik.
Në këtë kontekst disa mijëra ukrainas u mblodhën në Kiev të shtunën (12 shkurt) për të treguar unitet mes frikës së një pushtimi rus, udhëheqësi ukrainas u tha njerëzve të mos bëjnë panik.
Ukrainasit dolën nëpër qendrën e Kievit në një kolonë, duke brohoritur “Lavdi Ukrainës” dhe duke mbajtur flamuj ukrainas dhe pankarta që thoshin “Ukrainasit do të rezistojnë” dhe “Pushtuesit duhet të vdesin”.
Presidenti ukrainas, Volodymyr Zelenskiy, i cili ndoqi stërvitjet e policisë në rajonin jugor të Khersonit, tha se një sulm rus mund të ndodhte në çdo kohë, por kritikoi atë që e quajti sasi të tepërt informacioni në lidhje me një luftë të madhe të afërt.
“Miku më i mirë i armiqve tanë është paniku në vendin tonë. Dhe të gjitha këto informacione thjesht po shkaktojnë panik dhe nuk mund të na ndihmojnë. Unë nuk mund të pajtohem ose të mos pajtohem me atë që nuk ka ndodhur ende. Deri më tani, nuk ka asnjë luftë në shkallë të plotë në Ukrainë”, tha Zelenskiy
E pra zyrtarë të lartë ukrainas, nga presidenti dhe ministri i mbrojtjes deri te sekretari i Këshillit të Sigurisë Kombëtare dhe Mbrojtjes, kanë vënë në pikëpyetje bisedat e SHBA-së dhe Evropës në lidhje me planet e supozuara të Rusisë për një pushtim të plotë të Ukrainës.
Presidenti ukrainas Volodymyr Zelensky u ka kërkuar gazetarëve të ofrojnë prova për planet e supozuara të afërta të Rusisë për të nisur një pushtim të plotë të vendit të tij.
“Ka pasur shumë informacione për një luftë të plotë me Rusinë – madje janë shpallur edhe data specifike. Ne e kuptojmë se ka rreziqe. Nëse keni ndonjë informacion shtesë në lidhje me pushtimin 100 për qind të garantuar të Ukrainës nga Rusia më 16 shkurt, ju lutemi na jepni atë”, u tha Zelensky gazetarëve të shtunën.
Zelensky tha se ai nuk beson në rrezikun e një lufte në shkallë të gjerë për momentin. “Më duhet të flas me publikun me informacion real në dorë. Ne marrim informacion nga shumë burime. Kemi edhe shërbimin e inteligjencës. Nuk mendoj se është më keq se shërbimet e inteligjencës së vendeve të tjera,” vuri në dukje ai.
Presidenti ukrainas shtoi se vendi i tij duhet të përgatitet për hapa armiqësorë që vijnë “nga çdo kufi”.
Megjithatë në fjalët e tij të shtunën, Zelensky shprehu hutim për evakuimet e diplomatëve dhe tha se duhet të bëhen përpjekje politike dhe diplomatike për të ulur tensionet.
Fatkeqesisht atmosfera ushtarake po prevalon mbi ate diplomatike. Duket se ka një dëshirë të vrullshme për luftë, kur ende nuk janë ezauruar të gjitha mënyrat diplomatike për të zgjidhur këtë konflikt po në mënyrë diplomatike.
Ukraina padashur po përcakton drejtimin e botës sot, qoftë ky drejt një rendi botëror ose drejt një kursi të fundëm siç është ai i Luftës së Tretë Botërore. Të gjitha kancelaritë diplomatike duhet ta kanalizojnë këtë konflikt drejt një zgjidhje diplomatike, ndaj bisedimet nuk duhet të reshtin sado të gjata e të pafundmë të jenë ato.
Është koha për të folur tani, ndryshe e gjithë bota do të heshtë përgjithmonë.
