Rusia goditi me një sërë dronësh Ukrainën, në një tjetër natë sulmesh, thanë zyrtarët të hënën, ndërsa Kremlini ka dhënë sinjale se nuk heq dorë nga strategjia e saj për të sulmuar me bomba infrastrukturën civile.
Goditjet me dronë janë në vazhdën e sulmeve të ngjashme ruse në fund të vitit që u mbyll dhe fillimit të vitit të ri, përfshirë një sulm që shkaktoi vdekjen e 3 civilëve natën e ndërrimit të viteve.
Kryetari i bashkisë së Kievit, Vitali Klitschko tha të hënën se 40 dronë u drejtuan drejt Kievit gjatë natës. Sipas trupave të mbrojtjes ajrore, të gjithë dronët u shkatërruan.
Zoti Klitschko tha se 22 dronë u shkatërruan mbi Kiev, tre në rajonet afër Kievit dhe 15 në provincat fqinje.
Sipas kryebashkiakut, disa objekte të instrastrukturës energjetike u dëmtuan si pasojë e sulmit. Një 19 vjeçar mbeti i plagosur dhe u shtrua në spital, tha zoti Klitschko, ndërkohë që pati edhe ndërprerje të energjisë elektrike në Kiev.
Që prej muajit tetor, Rusia ka kryer sulme ajrore mbi infrastrukrurën e energjisë dhe të ujit të Ukrainës, thuajse çdo javë.
Presidenti i Ukrainës, Volodymyr Zelenskyy ka akuzuar Rusinë për “terrorizëm energjetik” pasi sulmet ajrore me bomba kanë lënë shumë njerëz pa ngrohje në tempertatura tejet të ulta.
Zyrtarët e Ukrainës thonë se Moska po përdor të ftohtin si armë për të demoralizuar rezistencën ukrainase.
Ukraina po përdor armë të sofistikuara të dërguara nga Perëndimi për të rrëzuar raketat dhe dronët të Rusisë, si dhe për të dërguar zjarr artilerie në zonat e kontrolluara nga Rusia.
Sulmi i Moskës ndaj Rusisë, që nisi në 24 shkurt, ka shkuar keq, duke rritur trysninë ndaj presidentit Vladimir Putin teksa trupat e tij përpiqen të ruajnë pozicionet dhe të përparojnë. Gjatë fjalimit drejtuar kombit për vitin e ri, zoti Putin tha se 2022 ishtë viti i vendimeve të vështira, por të domosdoshme.
Zoti Putin këmbëngul se ai nuk kishte zgjidhje tjetër, veçse të dërgonte trupa në Ukrainë sepse po kërcënohej siguria e Rusisë, një deklaratë që është dënuar nga Perëndimi, që thotë se Moska ka përgjegjësi të plotë për sulmin.
Rusia aktualisht është në periudhë festash publike deri më 8 janar.
Dronët, raketat dhe predhat e artilerisë të lëshuara nga forcat ruse goditën zona anembanë Ukrainës.
Pesë persona u plagosën në sulmet me bombë mëngjesin e së hënës në një zone të kontrolluar nga Ukraina në rajonin jugor të Khersonit, tha përmes platformës Telegram, guvernatori Jaroslav Janusheviç.
Zyrtari tha se forcat ruse sulmuan qytetin Beryslav, duke qëlluar ndaj një tregu lokal, me gjasë nga një tank. “Tre nga të plagosurit janë në gjendje të rëndë dhe po evakuohen në Kherson”, tha Janusheviç.
Shtatë dronë u qëlluan mbi rajonin jugor të Mykolaivit, sipas guvernatorit Vitali Kim dhe tre të tjerë u qëlluan në rajonin juglindor të Dnipropetrovskut, tha guvernatori Valentyn Reznichenko. Sipas tij, objektiv ishte infrastruktura energjitike.
Komanda e Forcave Ajrore të Ukrainës njoftoi të hënën se gjatë natës u lëshuan 39 drone Shahed të prodhuara nga Irani, dy dronë Orlan të prodhuar nga Rusia si dhe një raketë X-59.
“Ne po qëndrojmë të fortë,” shkroi në Twitter ministria ukrainase e Mbrojtjes.
Një sulm i fuqishëm gjatë Vitit të Ri la të vrarë të paktën katër civilë dhe plagosi dhjetra të tjerë anembanë vendit, njoftuan autoritetet ukrainase. “Viktima e katërt, një banor 46 vjeçar i Kievit, vdiq në një spital të hënën në mëngjes”, tha zoti Klitschko.
Në Rusi, një dron ukrainas goditi një njësi energjitike në rajonin Bryansk që kufizohet me Ukrainën, raportoi të hënën në mëngjes guvernatori rajonal i Bryanskut, Alexander Bogomaz. “Për pasojë, një fshat mbeti pa energji elektrike”, tha ai.
