Pas më shumë se gjashtë javë luftimesh që kanë shkatërruar zona të gjera të Gazës dhe kanë vrarë mijëra, Izraeli dhe grupi i armatosur palestinez Hamas kanë rënë dakord për një armëpushim katër-ditor.
Qeveria izraelite në një deklaratë mbrëmë (21.11) njoftoi se ka pranuar marrëveshjen për shkëmbimin e pengjeve dhe pauzën humanitare të konfliktit.
Kabineti i Izraelit ka miratuar pauzën humanitare prej 4 ditësh dhe kjo është faza e parë e objektivit për rikthimin e të gjithë pengjeve izraelite në Gaza, thuhet në deklaratën e qeverisë izraelite në të cilën shpjegohet se “Është parashikuar ndërprerja e konfliktit për lirimin e 50 pengjeve”.
Më tej në deklaratën e kabinetit izraelit thuhet se konflikti do të pezullohet për një ditë shtesë për çdo 10 pengje që do të lirohen dhe nënvizohet se qeveria dhe ushtria izraelite do të vazhdojnë luftën për eliminimin e Hamasit.
Gjithashtu edhe Hamasi njoftoi arritjen e marrëveshjes për shkëmbimin e pengjeve dhe pauzën humanitare. Në një deklaratë me shkrim, Hamasi ndau informacionin se pauza humanitare do të zgjasë 4 ditë dhe se gjatë kësaj do të lirohen 50 pengje izraelite në këmbim të 150 palestinezëve në burgjet izraelite.
Në përputhje me marrëveshjen, gjatë pauzës humanitare 4 ditore, kamionët me karburant dhe ndihma humanitare do të transportohen në çdo rajon të Gazës. Trafiku ajror në jug të Rripit të Gazës do të ndalet gjithë ditën ndërsa në veri 6 orë në ditë gjatë orës 10:00 dhe 16:00. Forcat izraelite do t’i përmbahen parimit për të mos ndaluar dhe për të mos sulmuar askënd në Rripin e Gazës.
Po ashtu informohet se është marrë garanci se njerëzit do të lëvizin lirshëm në Gaza gjatë rrugës Saladin nga veriu në jug.
Kreu i Zyrës së Marrëdhënieve Ndërkombëtare të Hamasit, Moussa Abu Marzouk deklaroi se marrëveshja e arritur për pauzën humanitare për konfliktin me Izraelin do të fillojë nesër në orën 10:00, transmeton Anadolu.
Abu Marzouk në një deklaratë për kanalin televiziv Al Jazeera Mubasher tha se marrëveshja që do të sigurojë pauzën humanitare për konfliktin me Izraelin do të fillojë nesër ( 23.11) në orën 10:00.
“Shumica e 50 pengjeve që do lirohen janë me origjinë të huaj”, tha Abu Marzouk duke shtuar se për çdo peng që kanë do të lirohen 3 të burgosur palestinezë nga burgjet izraelite.
Ai potencoi se nuk kanë burgje dhe se pengjet mbahen në shtëpitë e palestinezëve. “Për këtë arsye kur bombardohen shtëpitë vdesin edhe pengjet. Izraelit i mungon humanizmi. Duke i bërë presion e kemi detyruar Izraelin të lejojë hyrjen e ndihmave humanitare në të gjithë Rripin e Gazës”, tha Abu Marzouk.
Abu Marzouk shtoi se ata u kanë dhënë siguri të gjithë të burgosurve palestinezë në burgjet izraelite se do të lirohen.
Për çfarë kanë rënë dakord Izraeli dhe Hamasi?
-Të dyja palët kanë rënë dakord për një pauzë katër-ditore në luftime.
-Në këmbim, Hamasi ka rënë dakord të lirojë 50 gra dhe fëmijë civilë nga 237 robër të rrëmbyer që nga 7 tetori.
-Si pjesë e marrëveshjes, Izraeli ka rënë dakord të lirojë 150 gra dhe fëmijë palestinezë nga burgjet e tij.
-Katari ka thënë se marrëveshja do të lejojë një rritje të fluksit të ndihmave humanitare në Gaza.
-Izraeli tha se ishte i gatshëm të zgjaste pauzën përtej periudhës katër-ditore, duke shtuar një ditë për çdo 10 pengje shtesë të liruar nga Hamasi.
-Është e paqartë nëse Izraeli do të lirojë të burgosur të tjerë palestinezë nëse zgjatet armëpushimi.
Marrëveshja u ndërmjetësua nga Katari, i cili kishte udhëhequr negociatat midis Izraelit dhe Hamasit, ndërsa koordinohej me fuqitë e tjera rajonale dhe globale, përfshirë Shtetet e Bashkuara dhe Egjiptin.
Presidenti i SHBA Joe Biden falënderoi Emirin e Katarit Sheikh Tamim bin Hamad Al Thani dhe Presidentin Abdel Fattah el-Sisi të Egjiptit për rolin e tyre në përparim.
Kryeministri izraelit Benjamin Netanyahu tha se ai ishte mbështetur te Biden për të siguruar një marrëveshje më të mirë për Izraelin dhe falënderoi presidentin amerikan për përpjekjet e tij.
Netanyahu gjithashtu e bëri të qartë se vendi nuk po i jepte fund luftës së tij në Gaza dhe se ndalimi i luftimeve ishte vetëm i përkohshëm.
Presidenti i Palestinës, Mahmoud Abbas ka përshëndetur marrëveshjen për pauzë humanitare në Rripin e Gazës.
Sekretari i përgjithshëm i Komitetit Ekzekutiv të Organizatës për Çlirimin e Palestinës, Hussein Al-Sheikh, në një deklaratë me shkrim tha se “presidenti Abbas dhe lidershipi mirëpresin marrëveshjen e armëpushimit humanitar”.
“Ne e vlerësojmë përpjekjen e Katarit dhe Egjiptit që është bërë dhe ripërtërijmë thirrjen për një ndërprerje gjithëpërfshirëse të agresionit izraelit kundër popullit palestinez, futjen e ndihmës humanitare dhe zbatimin e një zgjidhjeje politike të bazuar në legjitimitetin ndërkombëtar për t’i dhënë fund okupimit dhe që populli palestinez të fitojë lirinë, pavarësinë dhe sovranitetin e tij”, tha Al-Sheikh.
Mbrëmë, Izraeli dhe Hamasi njoftuan një marrëveshje armëpushimi për pengjet, sipas të cilës 50 izraelitë të mbajtur nga Hamasi do të lirohen në këmbim të 150 të burgosurve palestinezë në burgjet izraelite.
Marrëveshja gjithashtu përfshin një pauzë 4-ditore në luftime dhe hyrjen në Gaza të 300 kamionëve me ndihma humanitare, përfshirë karburant. Marrëveshje lejon zgjatje të pauzës dhe lirimin e mundshëm të më shumë fëmijëve dhe grave të mbajtura nga të dyja palët.
Izraeli vlerëson se të paktën 239 izraelitë po mbahen nga Hamasi pas sulmit ndërkufitar të grupit palestinez më 7 tetor.
Që nga 7 tetori, kur luftëtarët e Hamasit sulmuan Izraelin jugor dhe vranë 1200 njerëz, ushtria izraelite ka bombarduar pa pushim Gazën me sulme ajrore dhe tokësore, duke vrarë më shumë se 14,000 palestinezë, kryesisht gra dhe fëmijë.
Mijëra ndërtesa, përfshirë spitale, xhami dhe kisha, gjithashtu janë dëmtuar ose shkatërruar nga sulmet ajrore dhe tokësore të Izraelit në enklavën e rrethuar.
Rreth 1.7 milionë palestinezë janë zhvendosur dhe detyruar nga ushtria izraelite të ikin në zonat jugore të Rripit.
/Argumentum.al
